امت نیوز ڈیسک//
سرینگر (جموں و کشمیر): کشمیر کے چند بالائی علاقوں میں ہلکی برف باری سے خطہ میں سردی کی شدت میں آج کمی دیکھی گئی۔ وہیں وادی کے بیشتر اضلاع میں پارہ نقطۂ انجماد سے اُوپر رہا۔ محکمۂ موسمیات کے مطابق، کشمیر کے شوپیاں اور گلمرگ میں آج صبح ہلکی برف باری دیکھی گئی۔ وہیں جموں صوبہ میں بھی چند ایک مقام پر ہلکی بارش ہوئی۔ ”
محکمہ کے مطابق، جموں و کشمیر کی گرمائی راجدھانی سرینگر میں آج رات کا درجۂ حرارت 1.2 ڈگری سیلسیس ریکارڈ کیا گیا۔ تاہم، اننت ناگ کشمیر کا سب سے سرد مقام رہا جہاں پارہ منفی 2.7 ڈگری سیلسیس ریکارڈ کیا گیا، پہلگام میں پارہ 0.2 ڈگری سیلسیس رہا جب کہ مشہور سکی ریزورٹ گلمرگ میں کم سے کم درجۂ حرارت منفی 1.5 ڈگری سیلسیس ریکارڈ کیا گیا۔
قاضی گنڈ میں پارہ 1.4 ڈگری سیلسیس رہا. جب کہ شوپیاں، کپواڑہ اور کوکرناگ میں بالترتیب منفی 1.6، 1.3 اور 1.2 ڈگری سیلسیس ریکارڈ کیا گیا۔ اسی طر ح برامُلہ میں شبنا درجۂ حرارت 0.6 جب کہ باندی پورہ میں 0.2 ڈگری سیلسیس ریکارڈ کیا گیا۔ وہیں صوبہ جموں کے تمام علاقوں میں بھی درجۂ حرارت نقطۂ انجماد سے اوپر ہی رہا۔ بانیہال میں سب سے کم 6.6 ڈگری سیلسیس درجۂ حرارت درج کیا گیا، جس کے سبب جموں صوبہ کی سب سے سرد ترین رات یہاں کے لوگوں نے محسوس کی۔
محکمۂ موسمیات کے مطابق، سرمائی راجدھانی جموں میں کل رات کا کم از کم درجۂ حرارت 11.2 ڈگری سیلسیس درج کیا گیا، کٹرا کا 11.2 ڈگری سیلسیس، کٹھوعہ میں 12.0 ڈگری سیلسیس اور بٹوٹ میں 8.5 ڈگری سیلسیس درج کیا گیا۔ بانیہال کے بعد بھدیروہ میں جموں صوبہ میں سب سے سرد ترین رات محسوس کی گئی، جب وہاں رات کا درجۂ حرارت 7.4 ڈگری سیلسیس پر پہنچ گیا۔ وہیں مرکزی زیر انتظام لداخ کے لیہہ میں منفی 6.9 ڈگری درج کیا گیا، کارگل میں منفی 4.8 ڈگری سیلسیس اور دراس میں منفی 6.9 ڈگری سیلز درج کیا گیا۔
