امت نیوز ڈیسک //
شوپیان:جنوبی کشمیر کے شوپیان ضلع میں سکیورٹی فورسز اور عسکریت پسندوں کے مابین انکاؤنٹر شروع ہوا ہے۔ تفصیلات کے مطابق فوج کی 34 راشٹریہ رائفلز سی آر پی ایف کی 178 بٹالین اور جموں و کشمیر پولیس نے عسکریت پسندوں کی موجودگی کی اطلاع موصول ہونے کے بعد چھوٹی گام شوپیاں علاقے کو جمعرات اور جمعہ کی درمیانی شب گھیرے میں لیکر گھر گھر تلاشی آپریشن شروع کیا۔ اس دوران عسکریت پسندوں نے فورسز اہلکاروں پر فائرنگ کردی جس کے ساتھ ہی انکاؤنٹر شروع ہو گیا۔
کشمیر زون پولیس نے سوشل میڈیا پلیٹ فارم ایکس پر ایک پوسٹ میں اس تازہ انکاؤنٹر کی جانکاری دیتے ہوئے لکھا کہ ‘شوپیان ضلع کے چھوٹی گام علاقے میں انکاؤنٹر شروع ہوا ہے۔ مزید تفصیلات بعد میں دی جائیں گی۔’انکاؤنٹر کی ابتدا میں رات کا اندھیرا ہونے کی وجہ سے رک رک کے گولیوں کا تبادلہ جاری رہا۔ بعد ازاں سکیورٹی فورسز نے پورے علاقے کی ناکہ بندی کرکے روشنی کا انتظام کیا۔ صبح ہونے کے بعد دونوں طرف سے گولیوں کے تبادلے میں شدت آ گئی۔ ذرائع کے مطابق علاقے میں ایک سے دو عسکریت پسند چھپے ہوسکتے ہیں۔ خبر تحریر ہونے تک علاقے میں انکاؤنٹر جاری ہے اور عسکریت پسندوں کے خلاف شوپیاں پولیس، فوج اور سی آر پی ایف کا مشترکہ آپریشن جاری ہے۔
اس سے قبل جمعرات کو جموں و کشمیر پولیس نے ایکس پر ایک ٹویٹ کے ذریعے جانکاری دی کہ بڈگام میں او جی ڈبلیو ماڈیول کا پردہ فاش کیا گیا ہے۔ ایک مختصر پوسٹ میں واقعہ کے بارے میں بتاتے ہوئے پولیس نے کہا تھا کہ بڈگام پولیس نے بیرواہ علاقے میں سات لوگوں کے ایک ماڈیول کو تباہ کر دیا ہے۔ یہ افراد بیرواہ علاقے اور اس کے آس پاس پوسٹر چسپاں کرکے ملک مخالف پروپیگنڈے میں ملوث تھے۔
