امت نیوز ڈیسک //
فوج کی 15 کور کے جنرل آفیسر کمانڈنگ لیفٹنٹ جنرل راجیو گھائی نے بانڈی پورہ ضلع کے گریز سیکٹر میں آگے والے علاقوں کا دورہ کیا اور آپریشنل تیاریوں کا جائزہ بھی لیا۔
دفاعی ترجمان نے اس کی تصدیق کرتے ہوئے بتایا کہ یوم جمہوریہ سے قبل انسداد دراندازی گرڈ کی تیاریوں کا جائزہ لینے کیلئے 15کور کمانڈر لیفٹیننٹ جنرل راجیو گھائی نے گریز سیکٹر میں لائن آف کنٹرول کے ساتھ آگے کے علاقوں کا دورہ کیا۔ انہوں نے کہا کہ دورے کے دوران فوجی کمانڈر نے انسداد دراندازی گرڈ اور آپریشنل تیاریوں کا جائزہ لیا۔
اس موقعہ پر لیفٹنٹ جنرل گھائی نے فوجیوں کے ساتھ بات چیت کے دوران، انہیں انتہائی موسمی حالات اور خطوں میں اعلی آپریشنل تیاری کی حالت میں رہنے کی تلقین کی۔خیال رہے کہ لائن آف کنٹرول کے پہاڑی گزرگاہیں عموماً سردیوں کے مہینوں میں شدید برف باری کی وجہ سے بند ہوجاتی ہیں، جس سے دہشت گردوں کی دراندازی کے امکانات کم ہوجاتے ہیں۔ تاہم، خشک سردی نے انسداد دراندازی گرڈ کو کنٹرول لائن کے ساتھ چوکسی بڑھانے پر مجبور کیا۔
