امت نیوز ڈیسک //
12 فروری : شمالی کشمیر کے اُوڑی میں ہفتہ کو سڑک حادثے میں زخمی ہونے والے چار افراد میں سے ایک شخص کی آج صبح موت ہوگئی۔
ایک اہلکار نے نیوز ایجنسی کشمیر اسکرول کو بتایا کہ اوڑی کا ایک زخمی شخص دو دن تک ہسپتال میں زیر علاج رہنے کے بعد زخموں کی تاب نہ لاتے ہوئے چل بسا۔
متوفی کی شناخت عبدالمجید بلوٹ ولد سما بلوٹ ساکنہ گھرکوٹ کے طور پر ہوئی ہے۔
اہلکار نے بتایا کہ عبدالمجید بلوٹ گزشتہ دو روز سے آئی سی یو میں تھے لیکن بدقسمتی سے آج ان کا انتقال ہوگیا۔ یہ حادثہ گھرکوٹ کے مقام پر اس وقت پیش آیا جب ایک ٹاٹا سومو جس کا رجسٹریشن نمبر JK05 H 6384 تھا ڈرائیور کے گاڑی پر سے کنٹرول کھونے کے بعد ٹکرا گئی۔
حادثے میں چار افراد زخمی ہوئے اور ان سب کو بعد ازاں جدید طبی امداد کے لیے جی ایم سی بارہمولہ منتقل کیا گیا۔ یہ واقعہ گزشتہ ہفتے ایک تباہ کن حادثے کے بعد اوڑی میں دوسرا سڑک حادثہ ہے جس کے نتیجے میں دس جانیں ضائع ہوئیں۔ (کشمیر اسکرول)
