امت نیوز ڈیسک //
جموں: بھارتیہ جنتا پارٹی کے جنرل سیکریٹری (آرگنائزیشن) اشوک کول نے کہا کہ الیکشن کمیشن آف انڈیا کے وفد کے ساتھ ملاقات کے دوران اسمبلی انتخابات کے انعقاد کے لئے دباؤ ڈالیں گے۔انہوں نے کہا کہ آنے والے پارلیمانی انتخابات میں بھاجپا جموں وکشمیر اور لداخ کی چھ نشستوں پر کامیاب ہوگی ۔ان باتوں کا اظہار موصوف نے جموں میں نامہ نگاروں سے بات چیت کے دوران کیا۔
انہوں نے کہا کہ آنے والے پارلیمانی چناؤ میں جیت کو یقینی بنانے کی خاطر بی جے پی نے جموں وکشمیر کے سبھی اضلاع میں مہم شروع کی ہے۔انہوں نے کہا کہ بی جے پی آگے بڑھ رہی ہیں اور پارلیمانی انتخابات میں بی جے پی کی جیت یقینی ہے۔ان کے مطابق بھاجپا نے ہر پولنگ اسٹیشن پر 370 ووٹ بڑھانے کی خاطر بڑے پیمانے پر مہم شروع کی ہے۔اشوک کول نے کہا کہ حزب اختلاف کے لیڈروں کے پاس کوئی ویژن نہیں ہم نے جتنے بھی وعدئے کئے انہیں پورا کیا۔
الیکشن کمیشن آف انڈیا کی جموں وکشمیر آمد پر اشوک کول نے کہا کہ بی جے پی کے لیڈران وفد کے ساتھ ملاقات کریں گے۔بی جے پی جنرل سیکریٹری نے کہا کہ الیکشن کمیشن آف انڈیا کے ساتھ ملاقات کے دوران اسمبلی انتخابات کے انعقاد کے لئے دباو ڈالیں گے۔انہوں نے کہا کہ بی جے پی جموں وکشمیر میں اسمبلی چناؤ کی خاطر پوری طرح سے تیار ہیں۔
واضح رہے کہ الیکشن کمیشن آف انڈیا 12 سے 13 مارچ کے درمیاں جموں و کشمیر کے دورے پر آرہے ہیں اس دوران ای سی آئی لوک سبھا انتخابات کے حوالے سے تیاریوں کا جائزہ لیں گے۔
(یو این آئی)
