امت نیوز ڈیسک //
سری نگر، 16 اپریل : جموں و کشمیر کے لیفٹیننٹ گورنر منوج سنہا نے منگل کو کہا کہ سری نگر کے گنڈبل علاقے میں دریائے جہلم میں کشتی الٹنے سے چھ افراد کی موت کے بعد وہ صورتحال پر مسلسل نظر رکھے ہوئے ہیں۔
خبر رساں ایجنسی – کشمیر نیوز آبزرور (کے این او) کے مطابق ایل جی کے دفترکی جانب سے ایکس پر ایک پوسٹ میں کہا گیا ہے کہ انتظامیہ سوگوار خاندانوں کو ہر ممکن مدد فراہم کر رہی ہے۔ ایل جی نے کشتی الٹنے سے جانی نقصان پر بھی دکھ کا اظہار کیا۔ "میں سری نگر میں ایک کشتی حادثے کی وجہ سے ہونے والے جانی نقصان پر بہت غمزدہ ہوں۔ میرے خیالات سوگوار خاندانوں کے ساتھ ہیں اور میں اللہ تعالیٰ سے دعا کرتا ہوں کہ وہ انہیں اس بے پناہ نقصان کو برداشت کرنے کی طاقت دے۔“
انہوں نے کہا کہ” ایس ڈی آر ایف، فوج اور دیگر ایجنسیوں کی ٹیم راحت اور بچاؤ کا کام کر رہی ہے۔ "انتظامیہ سوگوار خاندانوں کو ہر ممکن مدد فراہم کر رہی ہے جنہوں نے اپنے عزیز و اقارب کو کھو دیا ہے اور زخمیوں کو طبی سہولیات فراہم کی جا رہی ہیں۔ مارکوس ٹیموں کو بھی الرٹ کر دیا گیا ہے۔ میں صورتحال کی مسلسل نگرانی کر رہا ہوں اور زمین پر ٹیم کی رہنمائی کر رہا ہوں،‘‘۔
اس سے قبل سری نگر کے گنڈبل علاقے کے قریب دریائے جہلم میں اسکولی بچوں کو لے جانے والی کشتی الٹنے سے چھ افراد کی موت ہو گئی تھی، جب کہ تین دیگر ہسپتال میں زیر علاج تھے۔جبکہ ابھی کئی لاپتہ بتائے جا رہے ہیں ۔