امت نیوز ڈیسک //
سرینگر : ملک کی 543 نشستوں کے ساتھ ساتھ جموں وکشمیر کی پانچوں سیٹوں اور لداخ کی ایک پارلیمانی سیٹ پر ووٹوں کی گنتی کا عمل جاری ہے۔ ابتدائی رجحان کے مطابق بارہمولہ پارلیمانی نشست پر جیل میں قید عبد الرشید شیخ المعروف انجینئر رشید 51ہزار ووٹوں سے سابق وزیر اعلیٰ عمر عبداللہ اور سابق وزیر سجاد غنی لون سے آگے ہیں۔ سرینگر پارلیمانی نشست پر نیشنل کانفرنس کے سینئر لیڈر آغا سید روح اللہ مہدی 70ہزار ووٹوں سے آگے ہیں۔ وہ پی ڈی پی لیڈر وحید الرحمان پرہ اور اپنی پارٹی کے اشرف میر سے کافی آگے ہیں۔ مہدی 123068 ووٹوں کے ساتھ اس نشست پر مضبوط دعویدار ہے۔ اننت ناگ – راجوری سیٹ پر بھی این سی کے میاں الطاف سبقت حاصل کئے ہوئے ہیں میاں الطاف 239254 ووٹ حاصل کر چکے ہیں اور وہ پی ڈی پی صدر محبوبہ مفتی سے 132070 ووٹوں سے آگے ہیں۔ جموں خطے کی دو سیٹوں پر انڈیا بلاک اور بی جے پی کے درمیان مقابلہ ہے تاہم ابتدائی رجحان میں جموں پارلیکانی نشست میں بی جے پی کے جگل کشور شرما جبکہ ادھمپور پارلیمانی سیٹ پر بھی بی جے پی لیڈر اور مرکزی وزیر مملکت ڈاکٹر جیتندر سنگھ آگے ہیں۔ لداخ کی واحت نشست پر اگرچہ انڈیا بلاک، بی جے پی اور آزاد امیدوار کے درمیان مقابلہ ہے تاہم ابتدائی نتائج کے مطابق لداخ میں آزاد امیدوار حاجی حنیفہ آگے ہے اور ان کی جیت تقریباً یقینی ہے۔
