امت نیوز ڈیسک //
ہندواڑہ کے راجوار علاقے میں پیر کی شام اس وقت صف ماتم بچھ گئی جب پینے کے پانی کی تلاش میں نکلے ایک ہی خاندان کے چار افراد ایک المناک سڑک حادثے میں اپنی جانیں گنوا بیٹھے۔ یہ حادثہ کنچکی علاقے میں پیش آیا جب گاڑی قریب دو سو فٹ گہری کھائی میں جا گری.. متوفین کی شناخت غلام رسول بٹ، انکے فرزند امتیاز احمد بٹ، اور دو بیٹیاں شبنم آرا اور رفعت آرا کے طور پر ہوئی۔
اطلاعات کے مطابق راجوار میں پینے کا پانی نہ ہونے کے باعث یہ خاندان قریبی گاؤں سے پینے کا پانی لینے گیا تھا۔ جہاں انکے ساتھ یہ حادثہ پیش آیا ..
ادھر یہ خبر پھیلی تو پورے علاقے میں سراسیمگی پھیل گئی۔ آخری رسومات میں لوگوں کی کثیر تعداد نے شرکت کی۔
واضح رہے پچھلے کئی وقت سے راجوار کے لوگ صاف پینے کے پانی سے محروم ہیں اور انکی جانب سے اس سلسلے میں احتجاج بھی کیے گئے تاہم حکام کے کانوں پر جوں تک نہیں رینگی۔
