امت نیوز ڈیسک //
وزیر اعظم نریندر مودی نے ہر گھر ترنگا مہم میں شامل ہوتے ہوئے اپنا پروفائل فوٹو تبدیل کر لیا ہے۔ انہوں نے اپنی پروفائل پکچر میں ترنگے کی تصویر لگائی ہے۔ یوم آزادی سے پہلے انہوں نے کروڑوں ہم وطنوں سے ایسا کرنے کی اپیل کی ہے۔ اپنی پروفائل فوٹو کو تبدیل کرنے کے ساتھ ساتھ، انہوں نے لکھا کہ جیسے جیسے اس سال یوم آزادی قریب آرہا ہے، آئیے ہم سب مل کر ہر گھر ترنگا ابھیان کو ایک یادگار عوامی تحریک بنائیں۔ میں اپنی پروفائل فوٹو تبدیل کر رہا ہوں اور آپ سب سے گزارش کرتا ہوں کہ ایسا ہی کریں۔
ایک اور ٹویٹ میں پی ایم مودی نے ہندوستان چھوڑو تحریک کے بارے میں بھی بات کی ہے، جو ملک کی آزادی میں سنگ میل ثابت ہوئی۔ پی ایم مودی نے ایک ویڈیو شیئر کیا ہے جس میں انہوں نے تحریک کے بارے میں جانکاری دی ہے۔ اس ویڈیو کو شیئر کرتے ہوئے انہوں نے لکھا کہ باپو کی قیادت میں ہندوستان چھوڑو تحریک میں حصہ لینے والے تمام لوگوں کو خراج عقیدت۔ یہ واقعی ہماری آزادی کی جدوجہد کا ایک اہم لمحہ تھا۔
ہر گھر ترنگا مہم کیا ہے؟
پی ایم مودی نے 2022 میں ملک کی آزادی کے 75 سال مکمل ہونے پر ہر گھر میں ترنگا مہم شروع کی تھی۔ اس مہم کے تحت کہا گیا کہ ملک کے 20 کروڑ گھروں کی چھتوں پر ترنگا لہرایا جائے گا۔ حکومت نے اس مہم پر بہت زیادہ خرچ کیا تھا اور اس سے پہلے پرچم لہرانے کے قوانین میں بھی تبدیلی کی گئی تھی۔ قوانین میں تبدیلی کے بعد رات کو بھی ترنگا لہرانے کی اجازت مل گئی۔
