امت نیوز ڈیسک //
شوپیاں، 23 اگست: ضلع صدر پی ڈی پی اور سابق ایم ایل اے واچھی، اعجازاحمد میر نے جمعہ کو پارٹی چھوڑ دی اور امکان ہے کہ وہ آزاد حیثیت سے آئندہ جموں و کشمیر اسمبلی انتخابات لڑیں گے۔
نیوز ایجنسی – کشمیر نیوز آبزرور (کے این او) سے بات کرتے ہوئے میر، جو ڈی ڈی سی کے رکن بھی ہیں، نے کہا کہ پارٹی مینڈیٹ کسی اور کو دیے جانے کے بارے میں جان کر وہ حیران رہ گئے۔
انہوں نے کہا کہ وہ گزشتہ کئی مہینوں سے پارٹی کے لیے مہم چلا رہے ہیں اور جب انہیں مینڈیٹ کا علم ہوا تو وہ اپنے حلقے کے ایک گاؤں میں کارکنوں سے بات چیت کر رہے تھے۔ اگر پارٹی کا ایسا ارادہ تھا تو انہیں کم از کم مجھ سے رابطہ کرنا چاہیے تھا اور مجھے اعتماد میں لے کر کوئی فیصلہ کرنا چاہیے تھا۔ اس طرح مینڈیٹ چھیننا ذلت ہے اور آدمی ذلت کے سوا کچھ بھی برداشت کرسکتا ہے، اس لیے میں نے پارٹی چھوڑنے کا فیصلہ کیا ہے“۔
ان سے مستقبل کے لائحہ عمل کے بارے میں پوچھے جانے پر انہوں نے کہا کہ وہ الیکشن لڑیں گے لیکن ایک بار پھر اپنے کارکنوں کے ساتھ بیٹھیں گے اور انہیں اعتماد میں لے کر معاملات طے کریں گے۔
انہوں نے مزید کہا کہ مینڈیٹ کا فیصلہ پارٹیاں نہیں کرتیں بلکہ عوام کرتے ہیں اور مجھے امید ہے کہ لوگ میرے حق میں ووٹ دے کر اپنا مینڈیٹ دیں گے۔ امکان ہے کہ اعزاز میر اب آزاد امیدوار کی حیثیت سے الیکشن لڑیں گے۔ قابل ذکر بات یہ ہے کہ پی ڈی پی نے غلام محی الدین وانی کو واچھی کا حلقہ انچارج مقرر کیا ہے۔
