امت نیوز ڈیسک //
ڈوڈہ میں وزیر اعظم نریندر مودی کی انتخابی ریلی سے ایک دن پہلےجمعہ کو کشتواڑ سے 45 کلومیٹر دور چھترو علاقے میں ملی ٹینٹوں کے ساتھ انکاؤنٹر میں فوج کے دو جوان مارے گئے جبکہ دو دیگر شدید زخمی فوجیوں کو ہوائی جہاز سے ادھم پور کے کمانڈ اسپتال منتقل کیا گیا ہے۔
چترو اسپتال کے انچارج ڈاکٹر اشرف گیری نے دو فوجیوں کے ہلاکت کی تصدیق کرتے ہوئے کہا کہ لاشیں متعلقہ فوجی یونٹ کو بھیج دی گئی ہیں۔
چترو علاقے کے نائد گاؤں کے بالائی علاقے میں پننل دگ گڑا جنگلاتی علاقے میں ملی ٹینٹوں کی موجودگی کی اطلاع پر سیکورٹی فورسز نے آپریشن شاہ پورشل شروع کیا تھا۔ اس دوران ملی ٹینٹوں نے اندھا دھند فائرنگ شروع کردی۔ اچانک فائرنگ سے چار فوجی زخمی ہوگئے۔ زخمیوں کو اسپتال منتقل کر دیا گیا۔ جہاں دو دم توڑ گئے۔ مارے گئے فوجیوں کی شناخت نائب سوبیدار وپن کمار اور سپاہی وپن سنگھ کے طور پر ہوئی ہے۔
