امت نیوز ڈیسک //
پہلگام : کسی بھی چیز کا جنون ہمیشہ اچھا نہیں ہوتا ہے۔ اور خاص کر جب وہ شوقیہ ہو۔ جو لوگ جنوںِ شوق میں حد سے گزر جاتے ہیں ہمیشہ نقصان اٹھاتے ہیں۔ اس کی تازہ مثال مغربی بنگال کی ہے جہاں ایک 56 سالہ سیاح پہلگام کی بیتاب وادی میں دوران شب تصویریں کھینچنے کے دوران دریائے لدر میں ڈوب گیا۔
جب اس شخص کو ملاحوں نے نکالا تب تک بہت دیر ہوچکی تھی۔ اس ڈوبنے والے شخص کی شناخت دیو بروتا گھوش ولد جگن ناتھ گھوش کے طور پر ہوئی ہے۔ جو مغربی بنگال سے یہاں گھومنے آیا تھا۔ مگر تصویر کھینچنے کے دوران دریا میں ڈوب گیا۔
ایک سرکاری اہلکار نے بتایا کہ پہلگام کے بیتاب وادی میں دیر رات مغربی بنگال سے تعلق رکھنے والا سیاح اس وقت ڈوب گیا جب وہ دریائے لدر کے کنارے تصویریں کھینچ رہا تھا۔ بتایا جا رہا ہے کہ سیاح کا پاؤں اچانک پھسل گیا اور وہ دریائے لدر کے تیز بہاؤ میں ڈوب گیا۔
حادثہ کے فوراً بعد ریاستی ڈیزاسٹر رسپانس فنڈ (ایس ڈی آر ایف) پولیس نے مشترکہ طور بچاؤ کارروائی شروع کی، کڑی مشقت کے بعد سیاح کو بازیاب کیا گیا، اور اسے پہلگام کے پرائمری ہیلتھ سینٹر (پی ایچ سی) روانہ کیا گیا، جہاں پہنچنے پر ڈاکٹروں نے اسے مردہ قرار دے دیا۔ سیاح کی لاش پی ایچ سی پہلگام میں موجود ہے۔ دریں اثناء پولیس نے اس سلسلہ میں تفتیش شروع کر دی ہے۔
