امت نیوز ڈیسک //
سری نگر: جموں وکشمیر کے لیفٹیننٹ گورنر منوج سنہا نے وزیر خزانہ نرملا سیتا رمن کے پارلیمنٹ میں پیش کئے گئے سال 2025- 26 کے مرکزی بجٹ کی ستائش کی اور اس کو متوسط طبقے کے لئے حوصلہ افزا قرار دیا۔
بتادیں کہ وزیر خزانہ نرملا سیتا رمن نے ہفتے کو پارلیمنٹ میں سال 2025- 26 کے مرکزی بجٹ کو پیش کیا۔
منوج سنہا نے اس ضمن میں ‘ایکس’ پر ایک پوسٹ میں کہا: ‘ میں وزیر خزانہ نرملا سیتا رمن جی کا وِکشٹ بھارت کے لیے ایک عملی بجٹ کے لیے تہہ دل سے شکریہ ادا کرتا ہوں’۔
انہوں نے کہا: ‘غریبوں، نوجوانوں، کسانوں اور خواتین کے لیے معیشت کو تیز رفتار اور جرات مندانہ ترقیاتی اقدامات پر لانے کے لیے وزیر اعظم نریندر مودی جی کا بھی مشکور ہوں’۔
لیفٹیننٹ گورنر نے اس بجٹ کو متوسط طبقے کے لئے حوصلہ افزا قرار دیتے ہوئے کہا: ‘ ٹیکس کی شرح کا نظرثانی شدہ ڈھانچہ متوسط طبقے کی زندگیوں میں تبدیلی لانے کے لیے ایک تاریخی اقدام ہے’۔
انہوں نے کہا: ‘وزیر اعظم نے کرایہ پر ٹی ڈی ایس کی حد اور سماجی تحفظ کو بڑھا کر اور گیگ اکانومی کو باضابطہ بنا کر ٹیکس دہندگان کو بھی بہت بڑی راحت فراہم کی ہے’۔
ان کا کہنا ہے کہ سال 2025- 26 کا بجٹ تیز رفتار ترقی اور نجی شعبے کی سرمایہ کاری کی حوصلہ افزائی کے لیے ہندوستان کی بڑھتی ہوئی خواہش کی عکاسی کرتا ہے اور ایگری ڈسٹرکٹ پروگرام سمیت مختلف اقدامات کے ساتھ زرعی ترقی پر توجہ، دیہی خوشحالی اور سماجی مساوات کے وژن کی ترجمانی کرنا ہے۔
منوج سنہا نے کہا کہ ہندوستان تمام بڑی عالمی معیشتوں میں سب سے تیزی سے ترقی کرنے والا ملک ہے اور یہ بجٹ بنیادی ڈھانچے کے شعبے،ایم ایس ایم ایز، توانائی کے شعبے، اختراعات، روزگار کے مواقع کو مزید فروغ دے گا۔
انہوں نے کہا یہ بجٹ جامع اور پائیدار ترقی کے لیے کلیدی شعبوں میں تبدیلی کی اصلاحات کو آگے بڑھائے گا۔
