امت نیوز ڈیسک //
جموں و کشمیر کے وزیر اعلیٰ عمر عبد اللہ نے دہلی میں جاری ووٹوں کی گنتی کے بیچ ایک چبھتا ہوا طنز کیا ہے۔ انہوں نے انڈیا اتحاد کی پارٹیوں کے بیچ عدم اتحاد اور نتیجے میں ووٹوں کی تقسیم پر نشانہ لگاتے ہوئے ”مہابھارت” سیریل کے ایک مشہور سین کا میمس شیئر کیا۔ انہوں نے اپنے پوسٹ میں لکھا کہ ”اور لڑو آپس میں۔” اسی کے ساتھ انہوں نے مہاربھارت کے اس میمس کو پوسٹ کیا جس میں ایک سادھو کہتا ہوا نظر آ رہا ہے کہ ”جی بھر کر لڑو۔ ختم کر دو ایک دوسرے کو۔۔۔”
اپنے اس ٹویٹ کے ساتھ سی ایم عمر عبد اللہ اسمبلی انتخابات سے متعلق ایگزٹ پولز کو ری ٹویٹ کرتے ہوئے اپنا پیغام مزید واضح کیا۔ ان کا اشارہ انڈیا اتحاد میں شامل کانگریس اور عام آدمی پارٹی کی طرف تھا جو دہلی میں الگ الگ الیکشن لڑ رہی ہیں اور اس کا فائدہ بی جے پی کو ہوتا نظر آ رہا ہے۔ صرف کانگریس اور عآپ ہی نہیں بلکہ بی جے پی کے خلاف یکساں موقف رکھنے والی کچھ دیگر پارٹیاں بھی انتخابی میدان میں تھیں جس کی وجہ سے بی جے پی مخالف ووٹوں کے بٹنے کا خدشہ ظاہر کیا گیا ہے اور عمر عبد اللہ نے ووٹوں کی اس تقسیم پر چبھتا ہوا طنز کیا ہے۔
واضح رہے کہ ایگزٹ پولز میں بی جے پی اور عآپ کے بیچ کانٹے کی ٹکر دکھائی گئی ہے، کچھ ایگزٹ پولز میں تو بی جے پی کی جیت کی پیش گوئی کی گئی ہے۔ وہیں آج کاؤنٹنگ کے ابتدائی رجحانات میں بھی بی جے پی آگے چل رہی ہے۔
