امت نیوز ڈیسک //
جموں، 24 مارچ: جموں و کشمیر حکومت نے پیر کو کہا کہ جموں و کشمیر میں لوگوں کو 12 گیس سلنڈر مفت فراہم کرنے کی تجویز فی الحال زیر غور ہے۔ پیپلز کانفرنس کے ایم ایل اے سجاد غنی لون کے ایک سوال کے تحریری جواب میں، وزیر انچارج خوراک، شہری سپلائیز اور امور صارفین، ستیش شرما نے ایوان کو بتایا کہ جموں و کشمیر میں 12 گیس سلنڈر مفت فراہم کرنے کا معاملہ زیر غور ہے۔
خبر رساں ایجنسی – کشمیر نیوز آبزرور (کے این او) کے مطابق، وزیر نے کہا، "معاملہ حکومت میں زیر غور ہے۔ وعدوں کو پورا کرنے کے لیے تمام کوششیں کی جا رہی ہیں۔”
لون نے استفسار کیا تھا کہ کیا حکومت 12 گیس سلنڈر مفت فراہم کرنے کا ارادہ رکھتی ہے اور اگر ایسا ہے تو اس کے نفاذ کی ٹائم لائن کیا ہے۔
پچھلے سال نومبر میں ستیش شرما نے کہا تھا کہ جموں و کشمیر کے لوگوں کو سال میں 12 گیس سلنڈر فراہم کرنے کا باضابطہ اعلان جلد ہی کیا جائے گا۔ "طریقہ کار کو حتمی شکل دی جا رہی ہے اور بہت جلد ڈبل راشن اور 12 گیس سلنڈروں کے بارے میں باضابطہ اعلان عام کر دیا جائے گا“۔(کے این او)
