امت نیوز ڈیسک //
نئی دہلی: روس کے صدر ولادیمیر پوٹن نے وزیر اعظم نریندر مودی سے فون پر بات کی ہے۔ انہوں نے پہلگام میں حملے کی مذمت کی۔ ہندوستان کی وزارت خارجہ کے ترجمان رندھیر جیسوال نے ایکس پوسٹ پر یہ اطلاع دی۔
وزارت خارجہ کے ترجمان رندھیر جیسوال نے کہا کہ روسی صدر ولادیمیر پوٹن نے وزیر اعظم نریندر مودی کو فون کیا اور ہندوستان کے پہلگام حملے کی سخت مذمت کی۔ انہوں نے بے گناہ لوگوں کی موت پر گہرے رنج وغم کا اظہار کیا اور دہشت گردی کے خلاف جنگ میں ہندوستان کو مکمل تعاون کا یقین دلایا۔
پوتن نے زور دے کر کہا کہ اس گھناؤنے حملے کے مرتکب افراد اور ان کے حامیوں کو انصاف کے کٹہرے میں لایا جانا چاہیے۔ دونوں رہنماؤں نے ہندوستان-روس خصوصی اور مراعات یافتہ اسٹریٹجک شراکت داری کو مزید گہرا کرنے کے اپنے عزم کا اعادہ کیا۔
وزارت خارجہ کے مطابق، وزیر اعظم مودی نے صدر پوتن کو یوم فتح کی 80ویں سالگرہ پر مبارکباد دی اور انہیں اس سال کے آخر میں ہندوستان میں منعقد ہونے والی سالانہ چوٹی کانفرنس میں مدعو کیا۔
آپ کو بتاتے چلیں کہ روس کے صدر ولادیمیر پوٹن نے وزیر اعظم نریندر مودی کی سالانہ اعلیٰ سطحی میٹنگ کے لیے ہندوستان آنے کی دعوت قبول کر لی ہے۔ دونوں رہنمائوں نے ٹیلی فون پر بھی اس پر تبادلہ خیال کیا۔ کریملن نے پیر کو یہ اطلاع دی۔
دونوں رہنماؤں نے دہشت گردی کی تمام شکلوں میں بغیر کسی سمجھوتے کے لڑنے کی ضرورت پر زور دیا۔ کریملن نے ایک بیان میں کہا، "وزیراعظم مودی نے روس کے صدر کو سالانہ دو طرفہ سربراہی اجلاس کے لیے ہندوستان کے دورے کی دعوت دی۔ اس میں کہا گیا ہے کہ انہوں نے روسی ہندوستان تعلقات کی اسٹریٹجک نوعیت پر زور دیا۔ انہوں نے کہا کہ یہ تعلقات بیرونی اثر و رسوخ سے متاثر نہیں ہیں اور ہر سمت متحرک طور پر ترقی کرتے رہیں گے۔
