سرینگر/ اعجاز بابا
شمولیت، بااختیاری اور وقار جیسے اقدار کو فروغ دینے کے لیے یونیورسٹی آف کشمیر (KU) کے شعبہ بہبودِ طلباء (DSW) نے آج مرکزی کیمپس میں جسمانی طور سے سپیشل طلباء کے لیے ایک خصوصی میراتھن کا اہتمام کیا۔
یہ میراتھن جامعہ کے مولانا رومی گیٹ سے شروع ہوئی اور سینٹر آف سینٹرل ایشین اسٹڈیز (CCAS) KU پر اختتام پذیر ہوئی۔ اس کے بعد ایک اختتامی اور اعزازی تقریب منعقد ہوئی جس میں تمام شریک طلباء کو ان کے حوصلے اور استقامت پر خراجِ تحسین پیش کیا گیا۔
اس موقع پر وائس چانسلر KU پروفیسر نیلوفر خان نے شرکاء سے خطاب کرتے ہوئے کہا، "ہمارے سپیشل طلباء نے نہ صرف ایک میراتھن مکمل کی ہے بلکہ انہوں نے جرأت، وقار اور شمولیت کی ایک تحریک کی قیادت کی ہے۔ ہماری یونیورسٹی اس عزم پر قائم ہے کہ ہر طالب علم، خواہ وہ کسی بھی صلاحیت کا حامل ہو، باعزت، قابلِ ستائش اور بااختیار محسوس کرے۔”
قبل ازیں رجسٹرار KU پروفیسر نصیر اقبال نے میراتھن کا آغاز کرتے ہوئے کہا کہ یہ پروگرام حوصلہ اور امید کی علامت ہے۔ انہوں نے کہا کہ اس طرح کی تقریبات ہمیں یاد دلاتی ہیں کہ ہر طالب علم میں غیرمعمولی صلاحیتیں چھپی ہوتی ہیں، اور یونیورسٹی شمولیت کے اپنے عزم پر قائم ہے۔
استقبالیہ خطاب میں ڈین اسٹوڈنٹس ویلفیئر KU پروفیسر پرویز احمد نے کہا کہ ایسے پلیٹ فارمز سپیشل طلباء میں اعتماد اور شناخت کے جذبے کو فروغ دیتے ہیں۔
اس پروگرام کی نظامت اور انتظامات شعبہ بہبودِ طلباء کی اسپیشل سیل کے کوآرڈینیٹر جناب شاہیل محمد نے انجام دیے اور شکریہ کا کلمہ بھی ادا کیا۔
تقریب میں ڈائریکٹر CCAS پروفیسر وحید نثارو، پروفیسر تبسم فردوس (CCAS)، اور ڈاکٹر محمد سلطان راٹھر (اسپیشل سیل، DSW) بھی شریک ہوئے۔
پروگرام کی کارروائی ڈاکٹر شاہد علی خان، کلچرل آفیسر، DSW، KU نے چلائی۔
بعد ازاں طلباء کو ہارون گارڈن لے جایا گیا، جہاں انہیں تفریح، باہمی میل جول اور خوشگوار ماحول میں غور و فکر کا موقع فراہم کیا گیا۔
