امت نیوز ڈیسک //
سرینگر : جموں و کشمیر پردیش کانگریس کمیٹی کے صدر اور رکن اسمبلی طارق حمید قرہ نے ہفتہ کے روز انتظامیہ پر پارٹی کارکنوں کو سرینگر میں کانگریس ہیڈکوارٹر پہنچنے سے روکنے کا الزام عائد کرتے ہوئے اس اقدام کو ’’غیر جمہوری‘‘ اور ’’انتظامی مایوسی‘‘ کی علامت قرار دیا۔
سرینگر میں کانگریس ہیڈکوارٹر پر ای ٹی وی بھارت کے نامہ نگار کے ساتھ بات چیت کے دوران قرہ نے کہا کہ وادی کے مختلف حصوں سے کانگریس کارکنوں کو سرینگر آنے سے روکا گیا۔ کیونکہ پارٹی نے جموں و کشمیر کی ریاستی حیثیت کی بحالی کے مطالبے کو لے کر صوبائی کمشنر کشمیر کے دفتر میمورنڈم پیش کرنا چاہتی تھی۔ تاہم سینئر رہنماؤں سمیت سبھی کارکنان کو پارٹی ہیڈکوارٹر کے احاطے سے باہر جانے نہیں دیا گیا۔
قرہ نے بھارتیہ جنتا پارٹی (بی جے پی) کی قیادت والی مرکزی سرکار کو تنقید کا نشانہ بناتے ہوئے کہا کہ ’’جموں وکشمیر کے ریاستی درجے کی بحالی کے تعلق سے سپریم کورٹ کے صریح احکامات پر بھی عمل نہیں کیا گیا اور عدالتی حکمنامے کو اب تک نظر انداز کیا گیا۔ ایسے میں مرکزی سرکار توہین عدالت کی مرتکب ہے جسے کورٹ ہاؤس میں کھڑا کیا جانا چائیے۔‘‘
طارق حمید قرہ نے ایک سوال کے جواب میں کہا: ’’مرکزی سرکار 2019 سے یہ کہہ رہی ہے کہ جموں و کشمیر کو ریاستی درجہ ’مناسب وقت‘ پر دیا جائے گامگر یہ سمجھ سے بالاتر ہے کہ وہ مناسب وقت کب آئے گا؟‘‘ انہوں نے سوالیہ انداز میں کہا کہ ’’ریاستی درجے کی بحالی کے تعلق سے وزیر اعظم کا مناسب وقت کے کیا معنی اور اس کے حساب سے وہ وقت کب آئے گا۔‘‘
قرہ نے ایک سوال کے جواب میں کہا کہ نے کہا کہ ’’بی جے پی کی اندھی بہری سرکاری غیر سنجیدہ ہے اور جمہوری اصولوں کو نہ تو مانتی ہے اور نہ ہی اس پر کار بند ہے۔‘‘ انہوں نے مزید کہا کہ ’’ہمارا آج کا یہ پر امن احتجاج اندھی بہری سرکار کو جگانے کا ہے جو کہ گزشتہ 6 برسوں سے سوئی پڑی ہے۔‘‘ قرہ کے مطابق وہ اپنے مطالبے کو دہرانے کے لیے پرامن طور پر جمع ہوئے تھے، لیکن انہیں سڑکوں پر آنے سے روک دیا گیا اور پارٹی ہیڈکوارٹر تک ہی محدود رکھا گیا۔ انہوں نے کہا: ’’جمہوری سرکار میں یہ دباؤ ناقابل قبول ہے۔‘‘
انہوں نے مزید کہا کہ پارٹی 21 جولائی کو دلی کے لئے مقررہ مارچ سے پہلے اپنے احتجاج کو تیز کرے گی جہاں کانگریس کے سینئر رہنماؤں سے جموں وکشمیر کے ریاست کی بحالی کے تعلق سے مہم کو تیز کیا جائے گا۔ اس دوران طارق حمید قرہ نے ریاستی حیثیت کی بحالی کی حمایت میں وزیر اعظم کو خط لکھنے پر کانگریس کے صدر ملکارجن کھرگے اور راہل گاندھی کا شکریہ ادا کیا۔
