امت نیوز ڈیسک //
بانڈی پورہ، 16 اگست : ضلع اسپتال بانڈی پورہ کے میڈیکل سپرنٹنڈنٹ نے ہفتہ کے روز ڈاکٹر صابیہ سلام، میڈیکل آفیسر، کو ڈیوٹی سے غیر مجاز غیر حاضری اور سرکاری یومِ آزادی تقریب میں شرکت نہ کرنے پر معطل کردیا ہے اور ان کے طرزِ عمل کو "نظم و ضبط کی سنگین خلاف ورزی” قرار دیا ہے۔
معطلی کے حکم نامے کے مطابق، جس کی کاپی نیوز ایجنسی—کشمیر نیوز آبزرور (کے این او) کے پاس موجود ہے، ڈاکٹر سلام 14 اگست 2025 کو طے شدہ ڈیوٹی پر حاضر نہ ہو سکیں جس سے اسپتال میں مریضوں کی دیکھ بھال متاثر ہوئی۔
مزید یہ کہ افسرہ 15 اگست کو بھی غیر حاضر رہیں حالانکہ انہیں واضح اور تحریری ہدایات دی گئی تھیں کہ وہ یومِ آزادی کی تقریبات میں لازمی طور پر شرکت کریں۔
حکم نامے میں کہا گیا کہ اس قسم کا طرزِ عمل "قومی تقریب کی توہین اور بے اعتنائی” کے مترادف ہے اور "سرکاری ملازم کے شایانِ شان نظم و ضبط کے منافی” ہے۔
جموں و کشمیر سول سروسز (کلاسیفکیشن، کنٹرول اینڈ اپیل) رولز 1956 کے رول 31 اور جموں و کشمیر سول سروس ریگولیشنز کے آرٹیکل 128 کے تحت، میڈیکل سپرنٹنڈنٹ نے ڈاکٹر سلام کو فوری طور پر معطل کرنے کا حکم دیا ہے، جب تک کہ اس معاملے کی تحقیقات مکمل نہیں ہو جاتیں۔
معطلی کے دوران، ڈاکٹر سلام کو ضلع اسپتال بندی پورہ کے شعبہ چشم (آفتھلمولوجی) کے سربراہ کے ساتھ منسلک رکھا جائے گا اور انہیں قواعد کے مطابق وظیفہ (سبسسٹینس الاؤنس) فراہم کیا جائے گا۔ —(کے این او)
