امت نیوز ڈیسک //
ریاسی، 23 اگست : ریاسی ضلع کے مہور علاقے کے ملائی نالہ میں جمعہ اور ہفتہ کی درمیانی رات ایک مال بردار ٹرک مٹی کے تودے کی زد میں آگیا، جس کے نتیجے میں ڈرائیور موقع پر ہی ہلاک جبکہ دو افراد زخمی ہوگئے۔
حکام کے مطابق، گاڑی (رجسٹریشن نمبر JK20B-9578) مہور کی طرف جا رہی تھی کہ رات تقریباً 2 سے 3 بجے کے درمیان ملبے کی زد میں آگئی۔ زخمیوں کو فوری طور پر قریبی طبی مراکز منتقل کیا گیا۔
پی ایچ سی دھرماری کے ڈاکٹروں نے ڈرائیور کی شناخت شہباز احمد ولد بشیر احمد ساکن جملان مہور (ریاسی) کے طور پر کرتے ہوئے اسے مردہ قرار دیا۔
زخمیوں کی شناخت جاوید احمد ولد محمد حسین ساکن کنسولی، مہور، ریاسی اور عبدالغنی کے طور پر ہوئی ہے، جنہیں ابتدائی طبی امداد کے بعد مزید علاج کے لیے منتقل کیا گیا۔
پولیس نے اس سلسلے میں مقدمہ درج کر لیا ہے۔
