جموں میں سیلابی الرٹ جاری، پانی کی سطح میں اضافہ

امت نیوز ڈیسک //
جموں، 2 ستمبر:انتظامیہ نے جموں میں سیلابی الرٹ جاری کیا ہے کیونکہ مقامی دریاؤں اور ندی نالوں میں پانی کی سطح میں نمایاں اضافہ ریکارڈ کیا گیا ہے۔ یہ الرٹ محکمہ موسمیات کی پیشگوئی کے بعد جاری کیا گیا جس میں بتایا گیا ہے کہ آج رات اور کل دن بھر بھاری سے انتہائی بھاری بارش متوقع ہے۔

حکام نے خبردار کیا ہے کہ اگر بارش کا یہ سلسلہ جاری رہا تو صورتحال مزید بگڑ سکتی ہے اور نشیبی علاقوں میں سیلاب کا خدشہ ہے۔ لوگوں سے اپیل کی گئی ہے کہ وہ الرٹ رہیں اور احتیاطی تدابیر اختیار کریں، خاص طور پر وہ افراد جو آبی ذخائر کے قریب رہائش پذیر ہیں۔

ایمرجنسی ٹیموں کو تیار رہنے کی ہدایت دی گئی ہے جبکہ انتظامیہ صورتحال پر قریبی نظر رکھے ہوئے ہے۔ عوام کو مشورہ دیا گیا ہے کہ وہ حساس علاقوں میں غیر ضروری نقل و حرکت سے گریز کریں اور حکام کی جانب سے جاری کردہ تازہ ہدایات پر عمل کریں۔(کے این ٹی)