امت نیوز ڈیسک //
سرینگر، 23 نومبر: جموں و کشمیر میں معدنی ترقی کو بڑھاوا دینے کے لیے مرکز کی جانب سے پیر کو سات چونا پتھر (لائم اسٹون) کے بلاکس کی نیلامی کا آغاز کیا جائے گا۔ یہ پہلا موقع ہے کہ مرکز کی وضع کردہ شفاف نیلامی پالیسی کے تحت یونین ٹیریٹری میں معدنیات کی باقاعدہ بولی لگائی جارہی ہے۔
وزارتِ معدنیات نے اعلان کیا کہ یہ اقدام جموں و کشمیر کے روایتی نظامِ الاٹمنٹ سے ایک بڑی تبدیلی ہے، جو اب تک مقامی سطح پر دیے جانے والے چھوٹے لیز پر منحصر تھا۔
اہلکاروں کے مطابق نئی نیلامی سے مسابقت میں اضافہ، وسائل کی شفاف تقسیم اور پائیدار کان کنی کا طویل مدتی روڈ میپ تیار کرنا مقصد ہے۔
ساتوں بلاکس اننت ناگ، راجوری اور پونچھ میں تقریباً 314 ہیکٹر رقبے پر مشتمل ہیں۔ سروے سے ثابت ہوا ہے کہ ان مقامات پر صنعتی لحاظ سے تجارتی اہمیت کا حامل چونا پتھر موجود ہے، جو سیمنٹ سازی، تعمیرات اور دیگر صنعتوں میں بنیادی خام مال کی حیثیت رکھتا ہے۔
یہ بلاکس جی-3 اور جی-4 مرحلے کی تلاش میں ہیں۔ جی-4 مرحلہ وسیع علاقائی مطالعات، میپنگ اور ریموٹ سینسنگ پر مشتمل ہوتا ہے، جبکہ جی-3 میں زیادہ تفصیلی سروے اور سیمپلنگ کے ذریعے معدنی ذخائر کی تصدیق کی جاتی ہے۔
نیلامی کا باضابطہ آغاز 24 نومبر 2025 کو جموں میں یونین کوئلہ و معدنیات کے وزیر جی. کشن ریڈی کی موجودگی میں کیا جائے گا۔
یہ بولی ایم ایم ڈی آر ایکٹ کی دفعہ 11 کی ذیلی دفعات (4) اور (5) کے تحت کی جارہی ہے، جن کے ذریعے مرکز اُن ریاستوں یا یو ٹی انتظامیہ کی مدد کرتا ہے جہاں مقامی سطح پر نیلامی مکمل نہیں ہو پاتی۔
وزارت نے کہا کہ یہ عمل تعاون پر مبنی وفاقی نظام کی مثال ہے، جس کا مقصد زمینی سطح پر درپیش رکاوٹوں کے باوجود اصلاحات کو آگے بڑھانا ہے۔
نیلامی ٹیکنالوجی پر مبنی مسابقتی پلیٹ فارم کے ذریعے ہوگی، جس میں ماحولیاتی رہنما خطوط اور پائیدار ترقی کے اصولوں کی سختی سے پیروی کی جائے گی۔
حکام کے مطابق حکومت چاہتی ہے کہ معاشی ترقی ماحولیات کے تحفظ پر سمجھوتہ کیے بغیر آگے بڑھے۔
سرکار کو توقع ہے کہ اس اقدام سے روزگار کے مواقع پیدا ہوں گے، آمدنی میں اضافہ ہوگا، صنعتوں کی دلچسپی بڑھے گی اور مقامی آبادی کے لیے نئی معاشی راہیں کھلیں گی۔
وزارت کے مطابق چونا پتھر جیسے بنیادی تعمیراتی خام مال کو جدید نیلامی نظام میں لانا، یو ٹی کی صنعتی بنیاد کو مضبوط کرنے اور ’وِکست بھارت 2047‘ کے قومی وژن میں مددگار ثابت ہوگا۔
