امت نیوز ڈیسک /
سرینگر، 24 نومبر // جموں و کشمیر حکومت کل (منگل) کنڈرگارٹن کلاسوں کے لیے قبل از وقت سرمائی تعطیلات کے اعلان کا امکان ہے۔ درجہ حرارت میں مسلسل کمی اور شدید سردی کے باعث چھوٹے بچوں کے لیے صبح کے وقت اسکول جانا مشکل ہونے لگا ہے، جس کے پیشِ نظر یہ قدم اٹھایا جا رہا ہے۔
اسکول ایجوکیشن ڈیپارٹمنٹ کے ایک سینئر افسر نے جی این ایس کو بتایا کہ اس سلسلے میں باضابطہ حکم نامہ کل ہی جاری کیا جائے گا، اور منگل کنڈرگارٹن سمیت تمام پری پرائمری کلاسوں کا آخری ورکنگ ڈے ہوگا۔
انہوں نے کہا کہ "انتظامیہ موسم کی صورتحال پر مسلسل نظر رکھے ہوئے ہے، جو شدید سردی، ابر آلود موسم اور دن کے درجہ حرارت میں نمایاں کمی سے عبارت ہے۔”
افسر کے مطابق یہ فیصلہ ڈائریکٹوریٹ آف اسکول ایجوکیشن کشمیر سے مشاورت اور والدین کی بارہا اپیلوں کے بعد کیا گیا ہے۔
دریں اثناء، پہلی سے آٹھویں جماعت تک کی سرمائی تعطیلات سابقہ اعلان کے مطابق دسمبر کے پہلے ہفتے سے شروع ہوں گی۔ (جی این ایس)
