امت نیوز ڈیسک //
سرینگر، 6 دسمبر:وزیراعلیٰ عمر عبداللہ نے ہفتے کے روز جموں و کشمیر پبلک سروس کمیشن کے چیئرمین کو ایک خط لکھ کر اُس امتحان کو مؤخر کرنے کی درخواست کی ہے، جو عمر میں ممکنہ رعایت کے حوالے سے جاری غیر یقینی صورتحال کے بیچ کل منعقد ہونے والا ہے۔
وزیراعلیٰ عمر عبداللہ نے چیئرمین جے کے پی ایس سی، ارون کمار چودھری کو مخاطب اپنے خط میں لکھا:
"میں یہ خط اس غیر معمولی صورتحال کے تناظر میں لکھ رہا ہوں، جس کا سامنا اس وقت جموں و کشمیر کومبائنڈ کمپیٹیٹو (پریلیمری) امتحان 2025 کے امیدواروں کو ہے، جو جے کے پی ایس سی کی طرف سے منعقد کیا جانا ہے۔”
انہوں نے لکھا کہ ہوائی سروسز میں خلل پڑنے کے باعث پورے خطے میں سفر شدید متاثر ہوا ہے۔ اس کے ساتھ ہی عمر میں رعایت کے بارے میں پیش کیے گئے تجویز میں تاخیر سے پیدا ہونے والی غیر یقینی صورتحال نے بھی امیدواروں کی ذہنی اور عملی مشکلات میں اضافہ کیا ہے—وہ سہولت جو ماضی میں کئی مرتبہ دی جا چکی ہے۔
وزیراعلیٰ نے کہا کہ "یہ تمام عوامل مل کر امیدواروں کے لیے غیر معمولی ذہنی دباؤ اور مشکلات کا سبب بن رہے ہیں۔”
مزید لکھا:”مندرجہ بالا صورتحال کو مدِنظر رکھتے ہوئے، اور انصاف، برابری اور تمام امیدواروں کے لیے مساوی مواقع کے اصولوں کے تحت، میں کمیشن سے گزارش کرتا ہوں کہ وہ موجودہ حالات کا سنجیدگی سے جائزہ لے اور آنے والے امتحان کو مناسب مدت کے لیے مؤخر کرنے پر غور کرے، تاکہ امیدواروں کے مفاد کا مکمل تحفظ ہو سکے۔”
انہوں نے مزید یقین ظاہر کیا:”مجھے پورا بھروسہ ہے کہ کمیشن ہمیشہ کی طرح اس معاملے کو ہمدردانہ، متوازن اور وسیع تر عوامی مفاد میں دیکھے گا۔”
