امت نیوز ڈیسک //
سرینگر، 15 جنوری، کے این ٹی: وزیر اعلیٰ عمر عبداللہ نے جمعرات کے روز کہا کہ انہوں نے ایران میں بدلتی ہوئی صورتحال، بالخصوص وہاں موجود جموں و کشمیر کے طلبہ اور دیگر افراد کی سلامتی کے حوالے سے وزیر خارجہ ایس جے شنکر سے بات کی ہے۔
سوشل میڈیا پر ایک پوسٹ میں عمر عبداللہ نے کہا کہ وزیر خارجہ نے انہیں زمینی صورتحال سے آگاہ کیا اور وزارتِ خارجہ کی جانب سے ابھرتے ہوئے خدشات سے نمٹنے کے لیے تیار کیے جا رہے منصوبوں پر بریفنگ دی۔
وزیر اعلیٰ نے اپنی پوسٹ میں کہا،“میں ان کی اس یقین دہانی کے لیے شکر گزار ہوں کہ ایران میں موجود جموں و کشمیر کے طلبہ اور دیگر افراد کے مفادات اور جانوں کے تحفظ کے لیے ہر ممکن قدم اٹھایا جائے گا۔”
یہ بیان ایران کی موجودہ صورتحال پر بڑھتی ہوئی تشویش کے پس منظر میں سامنے آیا ہے، جہاں زیرِ تعلیم طلبہ کے اہلِ خانہ حالات پر گہری نظر رکھے ہوئے ہیں۔ وزیر اعلیٰ کی جانب سے کی گئی اس پیش رفت نے کئی والدین اور رشتہ داروں کو اپنے بچوں کی سلامتی کے حوالے سے اطمینان فراہم کیا ہے۔
عہدیداروں کے مطابق وزارتِ خارجہ بیرونِ ملک بھارتی مشنز کے ساتھ مسلسل رابطے میں ہے اور بھارتی شہریوں کی حفاظت اور سلامتی کو یقینی بنانے کے لیے صورتحال پر قریبی نظر رکھے ہوئے ہے۔ [کے این ٹی]
