امت نیوز ڈیسک //
سینئر صحافی، اردو صحافت کی معتبر آواز اور ہفتہ روزہ کشمیر ٹرولر کے مدیر اعلیٰ نثار پیرزادہ کی رحلت پر وائس آف ویکلی کشمیر کے زیرِ اہتمام ایک پُروقار تعزیتی اجلاس منعقد ہوا۔ اجلاس کی صدارت تنظیم کے کارڈی نیٹر شکیل آزاد نے کی۔
اجلاس میں مرحوم نثار پیرزادہ کی صحافتی خدمات کو تفصیل کے ساتھ یاد کیا گیا اور انہیں ایک باوقار، روشن مزاج، باہمت اور ہمیشہ سچ کے ساتھ کھڑے رہنے والی جری صحافتی شخصیت قرار دیا گیا۔ مقررین نے کہا کہ مرحوم نے صحافت کو محض پیشہ نہیں بلکہ ایک مقدس فریضہ سمجھ کر انجام دیا اور تمام عمر حق، دیانت اور اصول پسندی کی مثال قائم کی۔
شرکائے اجلاس نے اس بات پر زور دیا کہ اعلیٰ نثار پیرزادہ اردو صحافت کا ایک مضبوط ستون تھے، جنہوں نے مشکل حالات میں بھی قلم کی حرمت کو برقرار رکھا۔ ان کی تحریروں میں سماجی شعور، عوامی درد اور بے لاگ سچائی نمایاں ہوتی تھی، جو آنے والی نسلوں کے صحافیوں کے لیے مشعلِ راہ رہے گی۔
تعزیتی اجلاس میں وائس آف ویکلی کشمیر کے تمام معزز و مکرم ممبران نے شرکت کی، جن میں محمد شاہد ڈار، معرالدین فراز، ارشد میر، شبنم فیاض، منظور احمد بابا، فیاض احمد میر، سلام الدین بجاڈ، شفیق احمد، محمد روف خان، خالد وانی، عبدالرشید وار، عاصم فاروق,الطاف حسین اور بلال احمد درزی شامل تھے۔
اجلاس میں اس امر پر گہرے رنج و افسوس کا اظہار کیا گیا کہ آج کا صحافی شدید معاشی اور سماجی مشکلات سے دوچار ہے، اور اربابِ اقتدار کو چاہیے کہ وہ صحافت کے شعبے سے وابستہ افراد کی فلاح و بہبود، تحفظ اور مسائل کے حل کے لیے سنجیدہ اقدامات کریں، تاکہ جمہوریت کے چوتھے ستون کو مضبوط بنایا جا سکے۔
اجلاس کے اختتام پر مرحوم نثار پیرزادہ کے لیے دعائے مغفرت کی گئی اور ان کے اہلِ خانہ کے لیے صبرِ جمیل اور حوصلے کی دعا مانگی گئی۔
اللہ تعالیٰ مرحوم کو جنت الفردوس میں اعلیٰ مقام عطا فرمائے اور پسماندگان کو یہ عظیم صدمہ برداشت کرنے کی توفیق دے۔
