امت نیوز ڈیسک //
سری نگر، 5 جون: وسطی کشمیر کے ضلع بڈگام کے بیروہ علاقے میں جمعہ کو ایک اینٹ بھٹے پر کام کرنے والا غیر مقامی مزدور تیندوے کے حملے میں ہلاک ہوگیا۔
سرکاری ذرائع کے مطابق متوفی کی شناخت ہریش چندر (45) ولد کاشی، ساکن اتر پردیش کے طور پر ہوئی ہے، جو بیروہ کے باپوت علاقے میں محمد الطاف ٹھوکر کے اینٹ بھٹے پر مزدوری کرتا تھا۔
ذرائع نے بتایا کہ مزدور پر تیندوے نے حملہ کیا، جس کے بعد اس کی لاش اینٹ بھٹے سے کچھ فاصلے پر برآمد ہوئی۔
اطلاع ملتے ہی پولیس کی ایک ٹیم موقع پر پہنچی اور لاش کو اپنی تحویل میں لے لیا۔ بعد ازاں لاش کو قانونی و طبی کارروائیوں کے لیے اسپتال منتقل کیا گیا۔
پولیس نے واقعے کا نوٹس لیتے ہوئے تحقیقات شروع کر دی ہیں، جبکہ محکمہ جنگلی حیات کے حکام بھی علاقے کا جائزہ لے کر ضروری اقدامات کریں گے تاکہ مستقبل میں ایسے واقعات کی روک تھام کی جا سکے۔
