امت نیوز ڈیسک //
سرینگر: جموں کشمیر پولیس نے مرکزی سرکار کو جدید ہتھیار و تجدید کاری کے لئے 248 کروڑ روپے کا منصوبہ پیش کیا ہے جس کی منظوری کے لئے مرکزی وزارت داخلہ میٹنگ طلب کر رہی ہے۔ اس منصوبے میں جے کے پولیس نے یونین ٹیریٹری میں عسکریت پسندوں اور عسکریت پسندی سے مقابلے کے لئے جدید ہتھیار اور دیگر آلات کے لئے فنڈز کو منظوری دینے کی گزارشات پیش کی گئی ہیں۔
تاہم یہ منصوبہ اس وقت پیش کیا جا رہا ہے جب پولیس و سیکورٹی فورسز کے افسران کا کہنا ہے کہ کشمیر میں عسکریت پسندی کا زور بہت کم ہوا ہے اور تعداد میں بھی کمی آئی ہے۔ پولیس نے اس منصوبے میں کہا ہے کہ حالیہ مہینوں میں وادی میں عسکریت پسندوں سے کچھ جدید ہتھیار و آلات برآمد کئے گئے ہیں جن سے مقابلہ کرنے کے لئے پولیس کی تجدید کاری اہم ضرورت بن گئی ہے۔
ذرائع کا کہنا کہ ہے کہ مرکزی وزارت داخلہ اس منصوبے پر آج دلی میں میٹنگ منعقد کر رہی ہے جس میں جموں کشمیر پولیس کے ڈائریکٹر جنرل دلباغ سنگھ، محکمہ خزانہ اور دیگر متعلقہ افسران شرکت کریں گے۔
