امت نیوز ڈیسک //
نئی دہلی: وزیر اعظم نریندر مودی جاپان کے سابق وزیر اعظم شنزو آبے کی سرکاری آخری رسومات میں شرکت کے لیے ٹوکیو پہنچ گئے ہیں۔ وزیر اعظم نریندر مودی نے ٹوکیو میں اپنے جاپانی ہم منصب فومیو کیشیدا سے ملاقات کی۔ اس سے قبل خارجہ سکریٹری ونے موہن کواترا نے وزیر اعظم کے دورے کے بارے میں بتایا کہ تقریباً 12 سے 16 گھنٹے کے اس دورے کے دوران مودی آبے کے سرکاری آخری رسومات پروگرام میں شامل ہوں گے اور اس کے بعد دو طرفہ ملاقات کریں گے۔
آبے کی آخری رسومات میں سو سے زائد ممالک کے نمائندے شرکت کریں گے، جن میں 20 سے زائد ممالک کے سربراہان مملکت یا حکومت کے سربراہ ہوں گے۔ امریکی نائب صدر کملا ہیرس بھی وہاں ہوں گی۔ کواترا نے کہا کہ مسٹر آبے کی بھارت سے دوستی کو اقتصادی تعلقات سے آگے جاکر عالمی مجموعی اسٹریٹجک تعلقات تک لانے میں تعاون کے پیش نظر ہندوستان نے آبے کی موت پر 9 جولائی کو قومی سوگ کا اعلان کیا تھا۔ وزیر اعظم مودی کے ساتھ بھی ان کے قریبی ذاتی تعلقات تھے۔
شنزو آبے جاپان کے سب سے طویل عرصے تک وزیر اعظم تھےخارجہ سکریٹری نے کہا کہ اس دورے کے دوران مودی وزیر اعظم فومیو کشیدا اور محترمہ آبے سے ملاقات کرکے انہیں بھارت کی جانب سے تعزیت کا اظہار کریں گے اور کشیدا کے ساتھ ایک مختصر دو طرفہ ملاقات کریں گے۔ اس میٹنگ میں بھارت اور جاپان کے تعلقات اور باہمی تعاون کے پروگراموں میں پیش رفت کا جائزہ لیا جائے گا۔
