سری نگر:انجمن اوقاف جامع مسجد سرینگر نے اپنی اورنظر بند رکھے گئے سربراہ انجمن میرواعظ ڈاکٹر مولوی محمد عمر فاروق کی طرف سے کشمیر کے بلند پایہ ولی کامل حضرت شیخ العالم، شیخ نو رالدین نورانی ولی ؒجنہیں پیار اور محبت سے کشمیری عوام”نند ریشی“کے نام سے یاد کرتے ہیں، کے عرس پاک کے موقعہ پر حضرت شیخ العالمؒکو زبردست الفاظ میں خراج عقیدت ادا کرتے ہوئے انہیں شریعت و طریقت اور حقیقت و معرفت کاپیکر زیبا قرار دیا ہے۔
انجمن نے کہا کہ5 اگست2019 سے مسلسل خانہ نظر بندی کے سبب جناب میرواعظ اہالیان چرار شریف کی دعوت پر حسب معمول قدیم موصوف آستانہ عالیہ چرار شریف جاکراپنے وعظ و تبلیغ کے دوران حضرت علمدار کشمیرؒ کی عظیم الشان اور ناقابل فراموش دینی، ملی اور اصلاحی خدمات کو خراج عقیدت ادا نہیں کرپا رہے ہیں جو حد درجہ افسوسناک اور کشمیری عوام کیلئے باعث تشویش ہے۔
بیان میں حضرت علمدار کشمیر کے603 ویں سالانہ عرس پاک کی مناسبت سے کہا گیا کہ شیخ العالمؒبنیادی لحاظ سے ایک اعلیٰ پایہ کے دینی ور وحانی پیشوا اورایک عظیم مصلح اورمربی تھے جنہوں نے قرآن حکیم کی ابدی اور لافانی تعلیمات کو ہماری اپنی مادری زبان کشمیری میں پیش کرنے کی ایک انتہائی کامیاب اور مخلصانہ کوشش کی ہے۔
یہی وجہ ہے کہ صدیاں گذر جانے کے باوجود انکے کلام کی معنویت، افادیت، اہمیت،چاشنی اور بانکپن میں کوئی کمی نہیں آئی ہے اور جنہیں آج بھی کشمیری عوام خاص طور پرمیر واعظین و مبلغین پورے جوش و عقیدت کے ساتھ مجالس وعظ و تبلیغ میں پڑھتے اور پڑھاتے آرہے ہیں۔
انجمن نے کہا کہ حضرت شیخ نور الدین ولی ؒ کا عرس منانے کا حق تب ہی ادا ہو سکتا ہے جب کشمیری عوام آج کے نا مساعد حالات کے تناظر میں انکے دکھائے ہوئے شریعت اور طریقت اور خدمت خلق کے راستے کی حقیقی معنوں میں عملی طور پر پیرو ی کریں۔
