(نئی دہلی) جموں و کشمیر حکومت نے ایک اہم پیش رفت کے تحت اعلان کیا ہے کہ عسکریت پسندوں کے حملے سے متاثرہ افراد کے اہل خانہ کے لئے ایم بی بی ایس اور بی ڈی ایس داخلے کے لئے مخصوص نشستیں قائم کی جا ئیں گی۔ وزارت داخلہ (ایم ایچ اے) نے کہا ہے کہ عسکریت پسندوں کے حملے سے متاثرہ افراد کے بیوی بچوں کے لیے تعلیمی سال 2021-22 کے لیے مخصوص نشستوں پر ایم بی بی ایس اور بی ڈی ایس کے داخلے ہوں گے۔ حکومت ہند کے انڈر سکریٹری راجیو کمار نے اکتوبر2021 کے آخری ہفتے کے شروع میں جاری کردہ ایک سرکاری اعلامیہ میں کہا ہے کہ انہیں ایم بی بی ایس کی الاٹمنٹ کے لیے وزارت صحت و فیملی ویلفیئر کی طرف سے جاری کردہ رہنما خطوط کی ایک کاپی بھیجنے کی ہدایت دی گئی جس میں تعلیمی سال 2021ِِ-22 کے لیے عسکریت پسندوں کے حملے کا نشانہ بننے والے شہریوں کی بیوی اور بچوں کے لئے ایم بی بی ایس اور بی ڈی ایس جیسی ڈگریوں کے لئے مخصوص نشستوں پر داخلے دینے کی ہدایا ت درج ہیں۔ مرکزی حکومت نے ریاستی حکومتوں اور دیگر یونین ٹیریٹری انتظامیہ سے کہا ہے کہ وہ تعلیمی سال 2021ِِ-22 کیلئے اہل امیدواروں سے ایم بی بی ایس اور بی ڈی ایس سیٹوں کے لیے سینٹرل پول سے عسکریت پسندی کا شکار ہونے والوں کی بیویوں اور بچوں کے لیے درخواستیں طلب کرتے ہوئے اس کی بڑے پیمانے پر تشہیر کریں۔.
