(کولگام) جنوبی کشمیر کے ضلع کولگام میں پمبئی اور گوپال پورہ نامی دو دیہات میں بدھ کی شام بیک وقت ملی ٹینٹ مخالف آپریشن کئے گئے جن کے دوران ایک کمانڈر سمیت 5جنگجوئوں کی ہلاکت ہوئی۔ آئی جی پی کشمیر وجے کمار نے کمانڈر سمیت چارجنگجوئوں کی ہلاکت کی تصدیق کرتے ہوئے بتایا کہ ٹی آر ایف کمانڈر آفاق سکندر فورسز کو انتہائی مطلوب تھا ۔ کولگام کے پمبئی علاقے میں3 جنگجوئوں کی موجودگی کی اطلاع ملنے کے بعدپولیس کے سپیشل آپریشن گروپ،18بٹالین سی آر پی ایف اور 9آر آر نے پمبئی کا محاصرہ کیا اور تلاشی کارروائی شروع کی گئی۔اس دوران 4بجکر 48منٹ پر محصور جنگجوئوں کی جانب سے محاصرہ سے نکلنے کیلئے فائرنگ شروع کی گئی۔اس موقعہ پر طرفین کے دوران فائرنگ کا شدید تبادلہ ہوا جو کافی دیر تک جاری رہا جس میں 3جنگجو مارے گئے۔ ادھر پولیس کے مطابق انہیں پمبئی کے متصل ہی ایک اور ہمسایہ گائوں گوپال پورہ میں بھی ملی ٹینٹوں کی موجودگی کا علم ہوا جس کے بعد یہاں بھی محاصرہ کر کے آپریشن شروع کیا گیا۔ پولیس نے بتایا کہ پولیس کے سپیشل گروپ، 18بٹالین سی آر پی ایف اور 34آر آر نے تلاشیاں شروع کیں جس کے دوران سہ پہر5بجکر 15منٹ پر طرفین کے درمیان گولیوں کا تبادلہ شروع ہوا۔ بعد میں دو لاشیں بر آمد کی گئیں جن کے بارے میں دعویٰ کیا گیا کہ یہاں بھی دو ملی ٹینٹ مارے گئے۔ آئی جی پی نے کہا کہ جھڑپو ں کے مقام سے تمام مہلوک جنگجوئوں کی نعشیں بر آمد کر لی گئی ہے اور ان کی شناخت کرنے کیلئے کارورائی جاری ہے
