امت نیوز ڈیسک //
معروف امریکی اداکارہ انجلینا جولی نے اقوام متحدہ کے ادارہ برائے مہاجرین کے لیے خیرسگالی سفیر کے عہدے سے ریٹائرمنٹ لے لی ہے۔ یہ اعلان 47 سالہ آسکرایوارڈ یافتہ اداکارہ اور یو این ایچ سی آر کی طرف سے جمعہ 16 دسمبر کو جاری کردہ ایک مشترکہ بیان میں کیا گیا۔
بیان میں انجلینا جولی نے کہا ہے کہ دنیا میں جاری بحران کے تناظر میں وہ اپنی ‘ذمہ داریوں کا دائرہ وسیع‘ کرنا چاہتی ہیں اور یہ کہ وہ مہاجرین کے حقوق کے لیے اپنی لڑائی جاری رکھیں گی۔ اس بیان میں اقوام متحدہ کے ادارہ برائے مہاجرین کے سربراہ فیلیپو گرینڈی نے انجلینا جولی کی خدمات پر ان کا شکریہ ادا کیا اور ان کے نئے عزائم پر اپنی حمایت کا بھی یقین دلایا۔
انجیلینا جولی 2001ء سے یو این ایچ سی آر کے ساتھ کام کر رہی تھیں اور انہیں 2012ء میں اس ادارے کے لیے خیر سگالی کی سفیر مقرر کیا گیا تھا۔
انجلینا جولی اقوام متحدہ کے ادارہ برائے مہاجرین کی خصوصی نمائندہ کی حیثیت سے دنیا بھر میں مہاجرین اور آفات کا شکار ہونے والے افراد کی جانب دنیا کی توجہ دلانے کے لیے ان سے ملاقاتیں اور متاثرہ علاقوں کے دورے کرتی رہی ہیں۔
وہ 2005ء میں پاکستان میں آنے والے خوفناک زلزلے اور پھر 2010ء اور رواں برس شدید سیلاب کے بعد پاکستان کے دورے کر چکی ہیں۔
