امت نیوز ڈیسک //
سری نگر:کولگام کے ہالن علاقے میں جاری انکاونٹر کے دوران جاں بحق ہونے والے فوجی جوان وسیم احمد کے بانڈی پورہ میں واقع گھر میں ماتم کا ماحول سایہ فگن ہوا۔
تفصیلات کے مطابق جوں ہی وسیم احمد کے جاں بحق ہونے کی خبر علاقے میں پھیل گئی تو گھر میں صف ماتم بچھ گئی اور آس پڑوس کے لوگ اور دیگر احباب و اقارب ان کے گھر پر جمع ہوگئے۔
وسیم کے اہلخانہ خاص کر خواتین روتے اور سینہ کوبی کرتے ہوئے ماتم کناں ہیں۔
وسیم احمد کے چھوٹے بھائی زبیر سرور نے میڈیا کو بتایا: ‘مجھے رات کے ڈھائی بجے کال آئی کہ آپ کا بھائی زخمی ہوگیا اس کے بعد پھر کال آئی کہ آپ کا بھائی شہید ہوگیا’۔
انہوں نے کہا: ‘وہ سال 2014 میں بھرتی ہوا تھا اور سال 2021 میں اس کی شادی ہوئی تھی’۔
بتادیں کہ کولگام کے ہالن میں آپریشن کے دوران ملی ٹنٹوں کے ساتھ فائرنگ میں وسیم احمد سمیت تین فوجی جوان زخموں کی تاب نہ لا کر دم توڑ گئے۔
فوج کی چنار کور کی ٹویٹ کے مطابق تینوں جوانوں کو فوری طور پر فوجی ہسپتال منتقل کیا گیا جہاں تینوں زخموں کی تاب نہ کرکے دم توڑ گئے۔
علاقے میں آپریشن ہنوز جاری ہے۔
