امت نیوز ڈیسک //
پٹنہ: بہار کے وزیر اعلی اور جے ڈی یو کے سربراہ نتیش کمار نے اتوار کو راج بھون میں گورنر کو اپنا استعفیٰ سونپ دیا۔ نتیش کمار کی جے ڈی یو اراکین اسمبلی کے ساتھ ان کی رہائش گاہ پر ملاقات کے بعد یہ فیصلہ سامنے آیا ہے۔
نتیش کمار نے راج بھون میں گورنر راجندر وشواناتھ ارلیکر سے ملاقات کی اور این ڈی اے کی حمایت کے ساتھ اس بار سربراہی کا دعویٰ بھی کیا۔ بی جے پی کے اراکین اسمبلی نے وزیر اعظم نریندر مودی کی ‘من کی بات’ کے بعد نتیش کے لیے حمایت کا خط بھیجا ہے۔ قبل ازیں نتیش کمار نے گورنر راجندر وشواناتھ ارلیکر سے ملاقات کا وقت طلب کیا تھا۔
جے ڈی یو سربراہ و 72 سالہ سیاستداں اتوار کی شام 4 بجے کے قریب پھر سے بہار کے وزیراعلی کے عہدے کا حلف اٹھائیں گے۔ بہار اسمبلی میں 243 سیٹیں ہیں جہاں آر جے ڈی کے 79 اراکین اسمبلی ہیں، بی جے پی کے 78، جے ڈی یو کے 45، کانگریس کے 19، سی پی آئی (ایم-ایل) کے 12 اراکین اسمبلی ہیں۔ دریں اثناء بی جے پی کے قومی صدر جے پی نڈا کے اتوار کو حلف برداری کی تقریب میں شرکت کے لیے پٹنہ پہنچنے کی امید ہے۔
نتیش کمار کے لئے یہ پہلا موقع نہیں ہے جب انہوں نے صرف اقتدار پر رہنے کے لیے پارٹی تبدیل کی ہو۔ نتیش کمار کے پارٹی بدلنے کے بارے میں قیاس آرائیاں اس وقت سے شروع ہوئیں ہیں جب سے انہوں نے انڈیا اتحاد کے کنوینر کا عہدہ قبول کرنے سے انکار کر دیا تھا۔
