امت نیوز ڈیسک //
اننت ناگ : جنوبی کشمیر کے اننت ناگ ضلع میں ہفتہ کی دوپہر ایک دلدوز سڑک حادثہ میں دو کمسن بچوں سمیت آٹھ افراد ہلاک ہو گئے۔ ابتدائی معلومات کے مطابق ایک سومو گاڑی زیر رجسٹریشن نمبر JK03H9017ضلع کشتواڑ سے وادی کشمیر کی طرف آ رہی تھی اور ضلع اننت ناگ کے ڈکسم، کوکرناگ علاقے میں حادثہ کا شکار ہو گئی۔
معلوم ہوا ہے کہ سومو گاڑی ڈرائیور کے قابو سے باہر ہو گئی اور سڑک سے لڑھک کر گہری کھائی میں جا گری۔ اس حادثہ میں کل آٹھ افراد ہلاک ہو گئے ۔ ہلاک ہونے والوں میں ایک ہی کنبے کے پانچ افراد بھی شامل ہیں۔ ہلاک ہونے والوں میں دو خواتین بھی شامل ہیں۔ حادثے کی اطلاع موصول ہوتے ہی بچاؤ کارروائی / ریسکیو آپریشن شروع کر دیا گیا ہے۔
پولیس نے اس ضمن میں کیس درج کرکے مزید کارروائی شروع کر دی ہے۔ جبکہ ہلاک ہوئے افراد کو سب ضلع اسپتال پہنچایا گیا جہاں طبی و قانونی لوازمات کے بعد ان کی شناخت بھی جائے گی۔ پولیس کا کہنا ہے کہ لوازمات کی تکمیل کے بعد فوت ہوئے سبھی افراد کی جسد خاکی کو آخری رسومات کی انجام دہی کے لیے ان کے قانونی ورثاء کے سپرد کر دی جائے گی۔
