امت نیوز ڈیسک //
سری نگر، 24 اکتوبر (کے این او): شمالی کشمیر کے ضلع بارہمولہ میں گلمرگ میں لائن آف کنٹرول (ایل او سی) کے ساتھ بوٹا پاتھری کے ناگین علاقے کے قریب جمعرات کی شام ایک ملی ٹینٹ حملے میں دو پورٹر اور دو فوجی جوان مارے گئے۔
ایک اہلکار نے نیوز ایجنسی – کشمیر نیوز آبزرور کو بتایا کہ حملہ جمعرات کی شام اس وقت ہوا جب ملی ٹینٹوں نے فوج کی ایک پارٹی کو نشانہ بنایا۔ حملے میں دو پورٹر اور دو فوجی اہلکار ہلاک جب کہ تین زخمی ہوئے، جنہیں علاج کے لیے اسپتال منتقل کر دیا گیا ہے۔ حملے کے بعد سکیورٹی فورسز کی جانب سے حملہ آوروں کی تلاش کے لیے بڑے پیمانے پر سرچ آپریشن شروع کر دیا گیا ہے۔
واضح رہے کہ کشمیر میں گزشتہ پانچ دنوں میں یہ دوسرا بڑا حملہ ہے۔ اس سے پہلے اتوار کو سونمرگ کے گگنگیر میں ایک ڈاکٹر سمیت سات افراد ہلاک ہوئے تھے۔
دریں اثناء وزیر اعلیٰ عمر عبداللہ نے حملے کی مذمت کرتے ہوئے واقعہ کو افسوسناک قرار دیا۔ وہیں پی ڈی پی صدر محبوبہ مفتی اور اپنی پارٹی صدر الطاف بخاری نے بھی اس حملے کی مذمت کی ہے۔
