امت نیوز ڈیسک //
سری نگر: جموں وکشمیر کے لیفٹیننٹ گورنر منوج سنہا نے جمعہ کے روز بارہمولہ حملے میں جاں بحق ہونے والے فوجی جوانوں اور دفاعی پورٹرز کی میتوں پر پھول مالائیں چڑھا کر ان کو شاندار خراج عقیدت پیش کیا۔
بتادیں کہ شمالی کشمیر کے ضلع بارہمولہ کے بوٹہ پتھری علاقے میں ملی ٹینٹوں نے جمعرات کی شام فوجی گاڑی پر گھات لگا کر حملہ کیا جس کے نتیجے میں دو مقامی پورٹر اور دو فوجیوں سمیت چارافراد جاں بحق جبکہ تین فوجی جوان زخمی ہوئے ہیں۔
فوجی جوانوں کی شناخت رائفل میں جیون سنگھ اور رائفل مین قیصر احمد شاہ جبکہ پورٹرز کی شناخت مشتاق احمد چودھری اور ظہور احمد میر کے طور پر ہوئی ہے۔
موصوف لیفٹیننٹ گورنر نے جمعہ کو ‘ایکس‘ پر اپنے ایک پوسٹ میں کہا: ’ بوٹہ پتھری سیکٹر میں24 اکتوبر 2024 کو قوم کی خدمت میں عظیم قربانی دینے والے بہادر جوانوں اور ڈیفنس پورٹرز کو خراج عقیدت پیش کیا‘۔انہوں نے کہا:’ملک ان جوانوں کی بے لوث خدمت اور ان کی عظیم قربانی کو کبھی فراموش نہیں کرے گا‘۔ان کا پوسٹ میں مزید کہنا تھا: ’ہم غمزدہ خاندانوں کے ساتھ اظہار یکجہتی کرتے ہیں‘۔
