امت نیوز ڈیسک //
سری نگر: پولیس کا کہنا ہے کہ جنوبی کشمیر کے اونتی پورہ کے لارمو گائوں میں جمعرات کو ملی ٹنٹوں کی ایک کمیں گاہ کو تباہ کرکے اسلحہ و گولہ بارود بر آمد کیا گیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ایک خصوصی اطلاع پر کارروائی کرتے ہوئے اونتی پورہ پولیس، فوج کی 42 آر آر اور سی آر پی ایف کی 130 بٹالین کی ایک مشترکہ ٹیم نے اونتی پورہ کے لارمو علاقے میں ایک تلاشی آپریشن شروع کر دیا۔
انہوں نے کہا کہ ‘تلاشی آپریشن کے دوران گورنمنٹ مڈل اسکول لارمو میں دہشت گردوں کی ایک کمیں گاہ کا پردہ فاش کیا گیا اور اسلحہ و گولہ بارود اور مجرمانہ مواد بر آمد کیا گیا’۔
بیان کے مطابق بر آمد شدہ مواد میں 1 دستی بم، 1 یو بی جی ایل، 1 پستول میگزین،1 اے پی آئی 7.62 ایم ایم رائونڈ، 3 نارمل 7.62 ایم ایم رائونڈ، 1 پستول رائونڈ، 1 ٹوٹا ہوا میگزین، 1 الیکٹرک ڈیٹونیٹر، 4 نارمل نان الیکٹرک ڈیٹونیٹر، 1 پی ٹی ڈی سوچ، 1 نارمل سوچ، 10 میٹر فیوز تارم 2 9 وی بیٹریاں (وہ مواد جو آئی ای ڈی تیار کرنے میں استعمال کیا جاتا ہے)، 1 ڈاٹا کیبل، اور ایک بالٹین شامل ہے۔
ترجمان نے بتایا کہ اس ضمن میں پولیس اسٹیشن اونتی پورہ میں متعلقہ دفعات کے تحت ایک کیس درج کیا گیا اور مزید تحقیقات شروع کی گئیں۔
