امت نیوز ڈیسک //
اے آئی پی کے ارکان سری نگر میں پارٹی دفتر کے باہر جمع ہوئے تھے، جو تہاڑ جیل میں بند انجینئر رشید کی رہائی کا مطالبہ کرتے ہوئے پرامن بھوک ہڑتال کرنے کا ارادہ رکھتے تھے۔ تاہم جیسے ہی احتجاج شروع ہوا، پولیس نے مداخلت کی اور مظاہرین کو اپنے منصوبے پر آگے بڑھنے سے روک دیا۔
عینی شاہدین نے بتایا کہ پارٹی کے کئی کارکنوں کو علاقے سے منتشر ہونے سے پہلے مختصر طور پر حراست میں لیا گیا۔
اے آئی پی کے ایک حامی نے کہا، ’’ہم یہاں اپنے لیڈر کی رہائی کے لیے پرامن احتجاج کرنے آئے تھے، لیکن پولیس نے ہمیں اجازت نہیں دی۔‘‘
ضلع مجسٹریٹ سری نگر نے پریس کالونی میں پارٹی کی ’’ایک روزہ پرامن بھوک ہڑتال‘‘ کی اجازت دینے سے انکار کر دیا تھا۔ اے آئی پی کے کارکن سنگرمل شاپنگ کمپلیکس میں جمع ہوئے جہاں انہوں نے بھوک ہڑتال کرنے کا فیصلہ اس وقت کیا جب ضلعی حکام نے پارٹی کی جانب سے شہر کے لال چوک علاقے میں پرتاپ پارک کے قریب دھرنے کی درخواست مسترد کردی۔
مقام پر انتظار کرنے والے پولیس اہلکاروں نے اے آئی پی کارکنوں بشمول انجینئر رشید کے بیٹے ابرار کو گاڑیوں میں بٹھا کر کوٹھی باغ پولیس اسٹیشن میں حراست میں لے لیا۔
گرفتاری سے قبل ابرار نے صحافیوں کو بتایا کہ ان کے والد کو پارلیمنٹ کے اجلاس میں شرکت کی اجازت نہ دینا جمہوریت کا قتل ہے۔”
وہ ساڑھے پانچ سال سے جیل میں بند ہیں اور انہیں پارلیمنٹ میں جانے کی اجازت نہیں ہے۔
