امت نیوز ڈیسک //
جموں و کشمیر حکومت نے ایک اہم فیصلے کے تحت مقامی بلدیاتی اداروں کے لیے مخصوص پسماندہ طبقات (اوبی سی) کمیشن کی مدت میں 28 فروری تک توسیع کر دی ہے۔ یہ کمیشن گزشتہ سال اوبی سی کے لیے پنچایتوں اور شہری بلدیاتی اداروں میں ریزرویشن کا تعین کرنے کے لیے قائم کیا گیا تھا۔ ذرائع نے بتایا کہ حکومت جموں و کشمیر نے اس پینل کی مدت 28 فروری تک بڑھادی ہے۔ اس سے قبل کمیشن کی مدت 31 دسمبر 2024 کو ختم ہو چکی تھی۔
یہ پہلا موقع ہے کہ منتخب حکومت نے اس کمیشن کی مدت میں توسیع دی ہے۔ اس کمیشن کی سر براہی جسٹس (ریٹائرڈ) جنگ راج کو ٹوال کر رہے ہیں، جبکہ دیگر ممبران میں راج کمار بھگت ( ریٹائرڈ آئی اے ایس افسر ) اور پروفیسر (ڈاکٹر) مہندر سنگھ بڑوال ( سابق ڈین، SKUAST، جموں) شامل ہیں۔ ذرائع کے مطابق، کمیشن رواں ماہ کے آخر تک اپنی رپورٹ پیش کرنے کاامکان ہے۔ کمیشن کی رپورٹ جمع ہونے کے بعد پنچایتی اور میونسپل انتخابات کے انعقاد کی راہ ہموار ہو جائے گی۔
