(سرینگر) قومی تحقیقاتی ایجنسی (این آئی اے) نے آج صبح کشمیر کے مختلف مقامات پر چھاپے مارے۔ اطلاعات کے مطابق شوپیان اور بارہمولہ کے متعدد مقامات پر چھاپے مارے گئے۔ ذرائع کے حؤالے سے معلوم ہوا ہے کہ این آئی اےکی جانب سے تازہ چھاپہ مار کارروائی ضلع شوپیان کے مولو، چتراگام اور بنہ گام سمیت دیگر علاقوں ہوئی ہے۔ یہ چھاپے کس مقصد اور کن کے گھروں پر مارے گئے اس سلسلہ میں ابھی تفصیلات کا انتظار ہے۔ ضلع بارہمولہ کے پٹن علاقے میں بھی این آئی اے کی جانب سے چھاپا مار کارروائیاں کی گئیں۔ اطلاعات کے مطابق پٹن کے آرم محلہ میں جماعت اسلامی سے وابستہ سرکردہ کارکن کے گھر پر بھی چھاپا مارا گیا۔
تفصیلات کے مطابق این آئی اے کی جانب سے تازہ چھاپے مار کاروائی جماعت اسلامی کے کارکنان کے گھروں پرکیں گئی جس دوران کئی افراد کو گرفتار بھی کرلیا گیا ہے۔ یاد رہے کہ 28 فروری 2019کو وزارت داخلہ نے یو اے پی اے کے تحت جماعت اسلامی (جموں و کشمیر) کو پانچ سال کے لئے کالعدم قرار دیتے ہوئے بتایا تھا کہ جماعت اسلامی کشمیر ملی ٹنٹ تنظیموں کے رابطے میں ہے اور کشمیر سمیت دوسری جگہوں میں انتہا پسندی اور ملی ٹنسی کی تائید کرتی ہے۔ دریں اثنا تازہ چھاپے مار کاروائیوں اور گرفتاریوں کے حوالہ سے این آئی اے کی جانب سے ابھی تک کوئی بھی بیان جاری نہیں ہوا ہے۔
