امت نیوز ڈیسک //
نئی دہلی: راشٹریہ سویم سیوک سنگھ کے سربراہ موہن بھاگوت کی 75 سال سے متعلق حالیہ تبصرے پر سنگھ نے وضاحت جاری کی ہے۔ سنگھ کا کہنا ہے کہ بھاگوت نے یہ بات آر ایس ایس کے مفکر موروپنت پنگلے کی 75ویں جینتی (سالگرہ) کے موقع پر کہی تھی، اور اسے موجودہ حالات یا کسی مخصوص شخصیت سے جوڑنا غلط ہے۔
تاہم کانگریس اور ادھو ٹھاکرے کی شیوسینا اپنی سیاسی تشریحات کر رہی ہیں، جنہیں سنگھ نے بے بنیاد قرار دیا ہے۔ آر ایس ایس کے سربراہ موہن بھاگوت نے ناگپور میں منعقدہ ایک تقریب میں "Moropant Pingale: The Architect of Hindu Resurgence” نامی کتاب کی رسمِ اجرا کے موقع پر خطاب کیا تھا۔
انہوں نے کہا: ’’پنگلے جی نے ایک بار کہا تھا کہ جب آپ کی عمر 75 برس ہو جائے اور آپ کو ایک شال اوڑھا کر اعزاز دیا جائے، تو اس کا مطلب یہ ہوتا ہے کہ آپ ایک خاص عمر کو پہنچ چکے ہیں، اب آپ کو پیچھے ہٹ جانا چاہیے اور دوسروں کو کام کرنے دینا چاہیے‘‘۔ بھاگوت نے یہ بھی بتایا کہ موروپنت پنگلے نے ورنداون کے دورے کے دوران، اپنے 75ویں جنم دن پر شال اوڑھائے جانے کے بعد یہ بات کہی تھی۔
اگرچہ شال اعزاز کی علامت تھی، لیکن پنگلے نے اس کا گہرا مطلب سمجھا – یعنی نسلوں کی تبدیلی اور نوجوان قیادت کو موقع دینا۔ موہن بھاگوت نے اپنے خطاب میں موروپنت پنگلے کی زندگی کے کئی ان کہے واقعات کا بھی ذکر کیا۔ یہ ان کی عاجزی، خود آگاہی اور اعلیٰ اصولوں کی مثالوں پر مبنی ایک خراجِ عقیدت تھا۔
سنگھ کا کہنا ہے کہ اس بیان کو کچھ سیاسی حلقوں نے غلط انداز میں لیا اور اسے موہن بھاگوت کے اپنے مستقبل یا آر ایس ایس میں تبدیلی سے جوڑ دیا۔ جبکہ سنگھ کا مؤقف ہے کہ ’’یہ صرف موروپنت پنگلے جی کے لیے کہا گیا جملہ تھا، اس کا کسی اور سے کوئی تعلق نہیں‘‘۔
راشٹریہ سویم سیوک سنگھ (RSS) کے سربراہ موہن بھاگوت کے اُس بیان نے، جس میں انہوں نے 75 سال کی عمر کے بعد سیاست سے پیچھے ہٹنے کی بات کی تھی، سیاسی حلقوں میں ہلچل مچا دی ہے۔ اپوزیشن نے اس تبصرے کو لے کر ملک کی حکمراں جماعت بھارتیہ جنتا پارٹی (BJP) پر نشانہ سادھا ہے۔
حالانکہ سنگھ کا کہنا ہے کہ سرسنگھ چالک موہن بھاگوت کا بیان صرف آر ایس ایس کے مفکر موروپنت پنگلے کے 75ویں یومِ پیدائش کے موقع پر دیے گئے خطاب کے سیاق و سباق میں تھا، لیکن کانگریس اور اس کی اتحادی پارٹی شیو سینا (یو بی ٹی) اس کا ادھورا مطلب نکال کر سیاسی کھچڑی پکانے میں لگی ہوئی ہیں۔
آر ایس ایس نے واضح کیا ہے کہ یہ تبصرہ صرف موروپنت پنگلے کے لیے تھا، اور اس کا کسی اور شخص یا معاملے سے کوئی تعلق نہیں تھا۔ دوسری طرف، بھارتیہ جنتا پارٹی نے اب تک اپوزیشن کے طنز و تنقید پر کسی قسم کا ردعمل ظاہر نہیں کیا ہے۔
