امت نیوز ڈیسک ///
نئی دہلی، 9 ستمبر 2025: این ڈی اے کے امیدوار سی پی رادھا کرشنن منگل کو نائب صدر کے انتخاب میں کامیاب ہو گئے۔ انہوں نے اپوزیشن کے امیدوار بی سودرشن ریڈی کو شکست دی۔
راجیہ سبھا کے سیکرٹری جنرل پی سی موڈی نے بتایا کہ رادھا کرشنن کو 452 پہلی ترجیحی ووٹ ملے جبکہ کامیابی کے لیے 377 ووٹ درکار تھے۔ اس طرح انہوں نے 152 ووٹ کے فرق سے کامیابی حاصل کی۔ اپوزیشن کے امیدوار جسٹس سودرشن ریڈی کو 300 پہلی ترجیحی ووٹ ملے۔
کل 315 اپوزیشن ارکان پارلیمنٹ نے ووٹنگ میں حصہ لیا۔ انتخابی عمل صبح 10 بجے شروع ہوا اور شام 5 بجے تک جاری رہا، جب کہ ووٹوں کی گنتی شام 6 بجے شروع ہوئی۔
اس وقت پارلیمنٹ کے کل اراکین کی تعداد 781 ہے، جن میں 542 لوک سبھا کے اور 239 راجیہ سبھا کے اراکین ہیں۔ تاہم ایک لوک سبھا اور پانچ راجیہ سبھا کی نشستیں خالی ہیں۔ 13 اراکین نے ووٹنگ سے پرہیز کیا جن میں سات بیجو جنتا دل کے، چار بھارت رشترا سمیتی کے، ایک شرومنی اکالی دل کے اور ایک آزاد رکن شامل ہیں۔
