پی ایس اے مہراج ملک پر محض حضرت بل واقعہ سے توجہ ہٹانے کے لیے عائد کیا گیا: محبوبہ مفتی

امت نیوز ڈیسک //
سری نگر، 10 ستمبر: پیپلز ڈیموکریٹک پارٹی (پی ڈی پی) کی صدر محبوبہ مفتی نے بدھ کے روز لیفٹیننٹ گورنر منوج سنہا کی سربراہی والی انتظامیہ پر زور دیا کہ حضرت بل درگاہ واقعے کے سلسلے میں گرفتار شدہ افراد کے ساتھ ساتھ زیرِ حراست ڈوڈہ کے ایم ایل اے مہراج ملک کو بھی رہا کیا جائے۔

سری نگر میں صحافیوں سے گفتگو کرتے ہوئے محبوبہ نے کہا کہ عوامی نمائندے پر پبلک سیفٹی ایکٹ (پی ایس اے) کا اطلاق ناانصافی ہے۔
انہوں نے کہا: "پی ایس اے کسی عوامی نمائندے کے لیے قابلِ جواز نہیں، چاہے اس نے سرکاری افسران کے خلاف کوئی نازیبا زبان ہی کیوں نہ استعمال کی ہو۔ ایسی گرفتاریاں جمہوریت کو کمزور کرتی ہیں اور عوام کو اظہارِ رائے سے روکتی ہیں۔”

محبوبہ نے الزام لگایا کہ مہراج ملک کی گرفتاری محض حضرت بل واقعہ سے عوامی توجہ ہٹانے کے لیے کی گئی ہے۔ انہوں نے کہا: "ایک بیٹھے ہوئے ایم ایل اے کو محض توجہ کا رخ موڑنے کے لیے گرفتار کیا گیا ہے۔ یہ رویہ جمہوری نہیں ہے۔”

مزید برآں، محبوبہ نے کہا کہ جموں و کشمیر کو سری لنکا، بنگلہ دیش اور نیپال سے سبق لینا چاہیے، جہاں ان کے بقول عوامی آوازوں پر قدغنوں کے سنگین نتائج برآمد ہوئے۔ (کے این ٹی)