’خاموشی بہت ہو گئی، اب جاگنے کا وقت ہے‘: روح اللہ کا عمر حکومت پر شاہراہ بندش کو لے کر سخت حملہ

امت نیوز ڈیسک //
سرینگر، 16 ستمبر : سرینگر کے رکن پارلیمان آغا سید روح اللہ مہدی نے منگل کو عمر عبداللہ کی قیادت والی حکومت کو جموں۔سرینگر قومی شاہراہ کی مسلسل بندش کے معاملے پر سخت تنقید کا نشانہ بنایا، جو اس وقت سیب کی کٹائی کے عروج پر ہے۔

پریس کانفرنس سے خطاب کرتے ہوئے روح اللہ نے کہا کہ شاہراہ کی بندش نے ان باغبانوں کو شدید نقصان پہنچایا ہے جو اپنے پھل دہلی اور ملک کے دیگر حصوں تک وقت پر پہنچانے پر انحصار کرتے ہیں۔

انہوں نے خبردار کیا کہ اگر اس وقت سیاسی نمائندے خاموش رہے تو انہیں بھی اس کے نتائج بھگتنے پڑیں گے۔ ان کے بقول:
"اگر وہ اس وقت خاموش رہتے ہیں تو کل ان کی باری آئے گی۔ اگر وہ نہیں بولیں گے تو ہم سب کو کھڑا ہونا پڑے گا۔ یہ ایک جدوجہد ہے جو جاری ہے۔”

روح اللہ نے کہا کہ باغبانی، زراعت اور اس سے منسلک شعبے جموں و کشمیر کی معیشت کا 75 فیصد سے زیادہ حصہ ہیں۔ ان کے مطابق، صرف باغبانی ہی سیاحت سے سات گنا زیادہ معیشت میں حصہ ڈالتی ہے، مگر بار بار اس شعبے کو نشانہ بنایا جا رہا ہے۔

انہوں نے سوال اٹھایا:
"یہ کیسی جدوجہد ہے کہ آج بھی، تمام افراتفری کے باوجود، جب شاہراہ کھولی گئی ہے، تب بھی ہمارے ٹرکوں کو سرینگر سے جموں جانے کی اجازت نہیں ہے۔ پچھلے برسوں کی طرح اس سال بھی ہمارے پھل سڑنے دیے جا رہے ہیں۔”

روح اللہ نے اسے ایک بار بار دہرائے جانے والے منصوبے سے تعبیر کیا جس نے ریاست کی معیشت کو زبردست نقصان پہنچایا ہے۔ انہوں نے مزید بتایا کہ اس مسئلے پر انتظامیہ، باغبانوں کی انجمنوں اور قانون سازوں کے ساتھ بات ہوئی ہے اور فی الحال ٹرکوں کو مغل روڈ کے ذریعے جانے کی اجازت دی گئی ہے۔

"مجھے امید ہے کہ اسی طرح جلد ہی ٹرکوں کو سرینگر۔جموں شاہراہ پر بھی جانے کی اجازت ملے گی اور ہمارے پھل مارکیٹ تک پہنچ سکیں گے۔” روح اللہ نے کہا۔