امت نیوز ڈیسک //
سرینگر، 02 نومبر : سرینگر میں کھیلی جانے والی انڈین ہیون پریمیئر لیگ ٹی ٹوئنٹی، جس میں بین الاقوامی، قومی اور وادی کے مقامی کرکٹر شریک تھے، مکمل بدنظمی کا شکار ہوگئی ہے۔ کئی کھلاڑیوں نے مبینہ طور پر واجب الادا رقم کی عدم ادائیگی پر میچوں کا بائیکاٹ کر دیا ہے، جس سے یہ ہائی پروفائل نجی کرکٹ ایونٹ بحران کا شکار نظر آ رہا ہے۔
کھلاڑیوں نے لیگ میں شرکت سے انکار ظاہر کیا ہے، جبکہ کئی کھلاڑی جن کے میچ طے تھے، انہیں بتایا گیا کہ "گراؤنڈ نہ آئیں”، کیونکہ "تکنیکی مسائل” کی وجہ سے میچز منسوخ کر دیے گئے ہیں۔
خبر رساں ادارے کشمیر نیوز آبزرور کو موصول تفصیلات کے مطابق، مقامی اور بیرون ریاست کے متعدد کھلاڑیوں نے کھیلنے سے انکار کر دیا ہے کیونکہ لیگ منتظمین کی جانب سے وعدہ کی گئی ادائیگیاں پوری نہیں ہوئیں۔
اس سے قبل ایک مقامی کرکٹر نے اپنے عدم اطمینان اور ادائیگیوں میں بے ضابطگی کے سبب لیگ میں شرکت نہ کرنے کا اعلان کیا تھا۔
اسی دوران ہفتہ اور آج بکھشی اسٹیڈیم میں ہونے والے میچز بھی کھلاڑیوں کے فیلڈ میں نہ اترنے کے بعد منسوخ ہوگئے۔
دریں اثناء جموں و کشمیر اسپورٹس کونسل کے ایک اعلیٰ عہدیدار نے کو بتایا کہ کونسل کا لیگ سے کوئی تعلق نہیں ہے کیونکہ یہ ایک نجی ایونٹ ہے۔ انہوں نے صرف گراؤنڈ کرائے پر دیا تھا، جس کے لیے معمول کے مطابق فیس وصول کی گئی تھی۔ انہوں نے مزید کہا کہ جموں و کشمیر کی حکومت کا بھی اس ایونٹ سے کوئی تعلق نہیں۔
یہ بھی قابلِ ذکر ہے کہ کئی بین الاقوامی کھلاڑی سرینگر چھوڑ چکے ہیں جبکہ بیشتر مقامی کھلاڑی ابھی بھی ریڈیسن کلیکشن ہوٹل میں مقیم ہیں۔ ایک کھلاڑی نے نام ظاہر نہ کرنے کی شرط پر بتایا کہ ابھی تک لیگ کی صورتحال غیر واضح ہے اور انہیں ہوٹل سے باہر جانے کی اجازت نہیں۔
مزید برآں، ایک کھلاڑی نے بتایا کہ کیٹرنگ اسٹاف، بس ڈرائیورز اور دیگر لوگوں کی جانب سے بھی ادائیگی نہ ملنے کی شکایت کی گئی ہے۔ "ان کا بھی یہی کہنا ہے کہ ان کی رقم نہیں ملی اور وہ بھی تذبذب اور خوف میں مبتلا ہیں۔ ہمیں یہ بھی پتہ چلا ہے کہ کچھ آرگنائزر گزشتہ رات دیر گئے ہوٹل چھوڑ کر چلے گئے ہیں،” اس نے کہا۔
یہ بھی اہم ہے کہ لیگ کی تشہیر ایک معروف جے اینڈ کے کرکٹر نے کی تھی۔
چونکہ IHPL نہ تو بی سی سی آئی اور نہ ہی جموں و کشمیر کرکٹ ایسوسی ایشن (JKCA) سے منظور شدہ ہے، اس وجہ سے اب سوال اٹھائے جا رہے ہیں کہ ایسی نجی لیگز میں شفافیت، مالیاتی جوابدہی اور کھلاڑیوں کے تحفظ کی کیا ضمانت ہے۔ البتہ، اس سلسلے میں ابھی تک کسی کی جانب سے کوئی باضابطہ بیان سامنے نہیں آیا۔(کے این او)
