امت نیوز ڈیسک //
گاندربل، 20 نومبر: پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ جموں و کشمیر محبوبہ مفتی نے جمعرات کو بابانگری وانگت، کنگن کا دورہ کیا، جہاں انہوں نے دلی کے لال قلعہ کے باہر حالیہ دھماکے میں جاں بحق ہونے والے گاندربل کے نوجوان بلال احمد سانگو کے اہلِ خانہ سے تعزیت کی۔
انہوں نے سوگوار گھرانے سے ملاقات کی، ہمدردی کا اظہار کیا اور مرحوم کے ایصالِ ثواب کے لیے دعا بھی کی۔
میڈیا سے گفتگو کے دوران محبوبہ مفتی نے اس واقعے کو انتہائی افسوسناک اور دلخراش قرار دیا۔ انہوں نے حکومت سے اپیل کی کہ وہ متاثرہ خاندان کی ہر ممکن مدد کرے، کیونکہ وہ نہایت کڑے اور تکلیف دہ حالات سے گزر رہے ہیں۔
پی ڈی پی صدر نے کہا کہ کسی واقعے میں چند افراد کے ملوث ہونے کا یہ مطلب ہرگز نہیں کہ پورے جموں و کشمیر کے عوام کو اجتماعی طور پر سزا دی جائے۔ انہوں نے خبردار کیا کہ دہلی دھماکے کے بعد ملک کے مختلف حصوں میں نہتے اور بےگناہ کشمیریوں کو ہراسانی، خوف، دھمکی یا امتیازی سلوک کا نشانہ نہ بنایا جائے۔
محبوبہ مفتی نے حکومت سے مطالبہ کیا کہ وہ بیرونِ کشمیر رہنے والے طلبہ، مزدوروں اور دیگر شہریوں کے تحفظ کے لیے ٹھوس اقدامات کرے۔
انہوں نے امید ظاہر کی کہ وزیر اعلیٰ عمر عبداللہ اس معاملے کو وزیراعظم اور مرکزی وزیر داخلہ کے ساتھ اٹھائیں گے تاکہ کشمیریوں کے حقوق، سلامتی اور عزتِ نفس کا مکمل تحفظ یقینی بنایا جا سکے۔(کے این ٹی)
