(بارہمولہ) پولیس نے جمعرات کو لشکر طیبہ کے چار عسکریت پسندوں اور اُن کے ایک ساتھی کو گرفتار کرنے کا دعویٰ کیا ہے جو مبینہ طور پر منگل کو شراب کی دکان پر گرینیڈ حملے میں ملوث تھا جس میں راجوری کا ایک رہائشی ہلاک اور تین دیگر زخمی ہوگئے تھے۔تفصیلات کے مطابق بارہمولہ پولیس نے وائن شاپ پر حالیہ گرینیڈ حملے کے معاملے کو حل کرنے کا دعویٰ کیا ہے۔ پولیس کے مطابق 04 عسکریت پسند اور لشکر طیبہ کا ایک ساتھی گرفتار کیا گیا ہے اور ان کیے قبضے سے 5 پستول، 23 دستی بم، دھماکہ خیز مواد برآمد کیا گیا ہے۔ آئی جی پی کشمیر کا کہنا ہے کہ جنگجووں کا یہ ماڈیول بارہمولہ میں عسکری واقعات میں ملوث تھا، گرفتاریوں کے بعد اب اعلیٰ سطحی تفتیش جاری ہے۔ پولیس نے بتایا کہ شمالی کشمیر کے بارہمولہ ضلع میں منگل کو مشتبہ جنگجووں کے گرینیڈ حملے میں دیوان باغ میں ایک نئی کھلی شراب کی دکان کا ایک ملازم رنجیت سنگھ ولد کشن لال ساکن راجوری ہلاک جبکہ تین دیگر زخمی ہو گئے۔مہلوک کے خاندان نے 25 لاکھ روپے کی ایکس گریشیا اور خاندان کے ایک رکن کو نوکری دینے کا مطالبہ کیا ہے.
