سری نگر// جموں و کشمیر کے لیفٹیننٹ گورنر منوج سنہا نے کولگام میں خاتون ٹیچر کی ہلاکت کی شدید الفاظ میں مذمت کرتے ہوئے کہا ہے کہ اس بزدلانہ حملے کے مرتکبین کو نا قابل فراموش جواب دیا جائے گا۔
انہوں نے اپنے ایک ٹویٹ میں کہا: ’رجنی بالا نامی اسکول ٹیچر پر دہشت گردانہ حملہ قابل مذمت ہے میں پسماندگان کی خدمت میں تعزیت پیش کرتا ہوں‘۔
ان کا ٹویٹ میں مزید کہنا تھا: ’دہشت گردوں اور ان کے ہمدردوں کو یہ بزدلانہ حملہ انجام دینے پر نا قابل فراموش جواب دیا جائے گا‘۔
دریں اثنا سی پی آئی (ایم) کے سینئر لیڈر محمد یوسف تاریگامی نے اپنے ایک بیان میں اس واقعے کو بدقسمتی سے تعبیر کرتے ہوئے کہا کہ یہ شہری ہلاکتوں کے طویل فہرست میں ایک اور اضافہ ہے۔
انہوں نے کہا کہ انتظامیہ کی ذمہ داری ہے کہ ان ملازمین کو محفوظ مقامات پر تعینات کریں۔
بتادیں کہ کولگام کے گوپال پورہ علاقے کے ایک ہائی اسکول میں منگل کی صبح مشتبہ جنگجوؤں نے رجنی بالا نامی ایک ہندو خاتون ٹیچر پر گولیاں چلائیں جس کے نتیجے میں ان کی ہسپتال میں موت واقع ہوئی۔
